(មេនឆេស្ទើ)៖ កីឡាករ Ruben Dias បានព្រមព្រៀងបន្លាយកិច្ចសន្យា ២ឆ្នាំបន្ថែមទៀត លើកិច្ចសន្យាចាស់ដែលនឹងផុតកំណត់នៅឆ្នាំ២០២៧ ខាងមុខជាមួយ Manchester City ក្រោយពេលជួយជ្រោមជ្រែងឈ្នះពានផ្សេងៗចំនួន ១០រួចមក។ នេះបើយោងតាមការចេញផ្សាយដោយ BBC។

នេះមានន័យថា ខ្សែការពារអន្តរជាតិព័រទុយហ្គាល់ វ័យ ២៨ឆ្នាំរូបនេះ នឹងបន្តរត់លើទីលាន Etihad រហូតដល់ឆ្នាំ២០២៩ ជាមួយនឹងជម្រើសតបាន ១២ខែទៀតដែរ។

នៅចាំបាន Dias ត្រូវបានមេឃខៀវ Man City ទិញពីក្លិប Benfica លេងក្នុងលីគព័រទុយហ្គាល់នាអំឡុងឆ្នាំ២០២០ ក្នុងតម្លៃខ្លួនប្រមាណ ៦៥លានផោន។ រូបគេត្រូវបានបោះឆ្នោតជាប់ជាកីឡាករលេងល្អប្រចាំលីគ Premier League នៃរដូវកាលដំបូងរបស់លោកផងដែរ ស្ថិតក្រោមការដឹកនាំដោយលោក Pep Guardiola។

Dias បានរួមចំណែកជួយ City ឈ្នះពានផ្សេងៗដល់ទៅ ១០ពានឯណោះ ក្នុងរយៈពេល ៥ឆ្នាំមកនេះរួមមានពាន Premier League ៤ដង, FIFA Club World Cup និង UEFA Champions League បាន ១លើកដូចគ្នា រួមទាំងពាន FA Community Shield, FA Cup និង League Cup ថែមទៀតផង។

ក្រោយពីចុះកិច្ចសន្យាថ្មីរួចរាល់ Dias បានថ្លែងដោយក្តីរំភើបថា «ថ្ងៃនេះ ខ្ញុំពិតជារីករាយឥតឧបមា។ ខ្ញុំស្រឡាញ់ Manchester។ វាគឺជាផ្ទះរបស់ខ្ញុំបច្ចុប្បន្ន និងស្រឡាញ់អ្នកគាំទ្រក្លិប Man City ទាំងអស់»៕