(បរទេស)៖ ក្រុមហ៊ុន Meta បានចាប់ដៃគូជាមួយក្រុមហ៊ុន Midjourney ដែលជាក្រុមហ៊ុនបង្កើតរូបភាពដោយប្រើ AI ដ៏ល្បីល្បាញ ដើម្បីទទួលបានសិទ្ធិប្រើប្រាស់បច្ចេកវិទ្យាដ៏ទំនើបរបស់ពួកគេ។ នេះបើយោងតាមការចេញផ្សាយដោយ CNA នៅថ្ងៃទី២៣ ខែសីហា ឆ្នាំ២០២៥

លោក Alexandr Wang ប្រធានផ្នែក AI របស់ក្រុមហ៊ុន Meta បានលើកឡើងថា កិច្ចសហការនេះមានគោលបំណងបង្កើនគុណភាពរូបភាពលើផលិតផលរបស់ Meta ដើម្បីប្រកួតប្រជែងជាមួយក្រុមហ៊ុនធំៗដូចជា OpenAI (ChatGPT) និង Google។

សមត្ថភាពរបស់ Midjourney ក្នុងការបំប្លែងអក្សរទៅជារូបភាពនឹងជួយ Meta ក្នុងការបង្កើតមុខងារច្នៃប្រឌិតថ្មីៗសម្រាប់អ្នកប្រើប្រាស់ និងអ្នកទីផ្សារ ព្រមទាំងជួយកាត់បន្ថយការចំណាយក្នុងការផលិតមាតិកា និងបង្កើនការចូលរួមរបស់អ្នកប្រើប្រាស់ផងដែរ។

គួរជម្រាបថា កិច្ចព្រមព្រៀងនេះបានកើតឡើងបន្ទាប់ពីក្រុមហ៊ុន Meta បានរៀបចំរចនាសម្ព័ន្ធផ្នែក AI របស់ខ្លួនឡើងវិញ ក្រោមឈ្មោះ Superintelligence Labs៕