(ឡុងដ៍)៖ Big Match ២ប្រកួតបើកឆាកលីគកំពូលអង់គ្លេស Premier League 2025-26 សុទ្ធតែរងបរាជ័យក្នុងដីដូចគ្នា ពោលគឺក្រុមខ្លាំងប្រចាំទីក្រុង Manchester តែមួយផងដែរ។ នេះបើយោងតាមការចេញផ្សាយដោយ BBC។

បិសាចក្រហម Manchester United បានចាញ់កាំភ្លើងធំ Arsenal ១ទល់នឹង០ នៅកីឡដ្ឋាន Old Trafford របស់ខ្លួន នៅថ្ងៃបើកឆាកសប្តាហ៍ទី១ នៅ Premier League នៅមុនពេលមេឃខៀវ Manchester City ដែលស្ថិតក្នុងទីក្រុង Manchester ជាមួយគ្នា បានរងបរាជ័យ ២-០ នៅកីឡដ្ឋាន Etihad ផងដែរ ក្រោមថ្វីជើងរបស់ Tottenham Hotspur ប្រចាំសប្តាហ៍ទី២ នារាត្រីថ្ងៃសៅរ៍។

ក្រុមរបស់លោក Pep Guardiola បានរបូត ២គ្រាប់តែម្តងនៅត្រឹមរយៈពេល ៤៥នាទីនៃវគ្គទី១ និងពុំអាចឆ្លើយតបចំពោះមាន់ខ្នាយមាសបានឡើយ បើទោះបីជាខិតខំសម្រុកយ៉ាងណាក៏ដោយក្នុងវគ្គទី២។

នេះមានន័យថា Man City បានដើរតាមគន្លងចាស់ស្រដៀងនឹងជើងទី១ ក្នុងលីគនារដូវកាល ២០២៤-២៥ ដែលពួកគេបានបរាជ័យដល់ទៅ ៤ទល់នឹង០ ក្រោមថ្វីជើងរបស់ Spurs ក៏ប៉ុន្តែលេងជើងទី២ យកបាន ៣ពិន្ទុវិញ តាមរយៈលទ្ធផលឈ្នះ ១-០ នៅកីឡដ្ឋាន Tottenham៕