(ភ្នំពេញ)៖ សហព័ន្ធកីឡាយុទ្ធគុនចម្រុះកម្ពុជា បានបញ្ជូនប្រតិភូ ដែលជាអាជ្ញាកណ្ដាល និងគ្រូបង្វឹក ៤រូប ចូលរួមកម្មវិធីអភិវឌ្ឍន៍ក្រុមប្រឹក្សាអូឡាំពិកអាស៊ី-សមាគមកីឡាយុទ្ធគុនចម្រុះអាស៊ីបណ្តុះបណ្តាលអាជ្ញាកណ្ដាល និងគ្រូបង្វឹក លើកទី១ (1st OCA – AMMA Referees & Coaches Development Program) នៅទីក្រុង Manama ប្រទេសបារ៉ែន ចាប់ពីថ្ងៃទី២៥-២៧ ខែសីហា ឆ្នាំ២០២៥ ខាងមុខ។

លោក ជឹម ធារ៉ា អគ្គលេខាធិការសហព័ន្ធ បានឲ្យដឹងថា ដោយទទួលបានការយកចិត្តទុកដាក់ និងការគាំទ្រពីប្រធានសហព័ន្ធលោក វ៉ាត់ ចំរើន ក្រោមការសម្របសម្រួលរបស់គណៈកម្មាធិការជាតិអូឡាំពិកកម្ពុជា សហព័ន្ធបានចាត់បញ្ជូនប្រតិភូ ៤រូប ដើម្បីចូលរួមវគ្គបណ្ដុះបណ្ដាលកម្រិតទ្វីបខាងលើ ដែលរៀបចំឡើងក្រោមកិច្ចសហការរវាងក្រុមប្រឹក្សាអូឡាំពិកអាស៊ី(OCA) និងសមាគមកីឡាយុទ្ធគុនចម្រុះអាស៊ី(AMMA) ដើម្បីឆ្លើយតបនឹងភាពរីកចម្រើនរបស់វិស័យកីឡាយុទ្ធគុនចម្រុះទូទាំងតំបន់អាស៊ីនាពេលបច្ចុប្បន្ន។

លោកបន្ដថា «បន្ទាប់ពីក្រុមប្រឹក្សាអូឡាំពិកអាស៊ី បានបង្កើតឲ្យមានសមាគមកីឡាយុទ្ធគុនចម្រុះអាស៊ី បច្ចុប្បន្ន MMA បានហក់ចូលព្រឹត្តិការណ៍ធំៗស្ទើរគ្រប់ព្រឹត្តិការណ៍កីឡារបស់ក្រុមប្រឹក្សាអូឡាំពិកអាស៊ី។ ដូច្នេះទើបក្រុមប្រឹក្សាអូឡាំពិកអាស៊ី បានប្រមូលផ្ដុំបណ្ដាប្រទេសទាំងអស់ជាង ៣០ប្រទេស ដើម្បីបញ្ជូនមនុស្សសំខាន់ៗ ចូលរួមវគ្គបណ្ដុះបណ្ដាលអាជ្ញាកណ្ដាល និងគ្រូបង្វឹក លើកដំបូងនេះ ដើម្បីឲ្យគាត់បានយល់កាន់តែច្បាស់ អំពីបទបញ្ជាការប្រកួត និងការអនុវត្តរួមគ្នា ក្រោមស្មារតីកីឡារបស់ក្រុមប្រឹក្សាអូឡាំពិកអាស៊ី»។

លោកបន្ថែមថា ដោយសារកីឡាយុទ្ធគុនចម្រុះ មានច្រើនទម្រង់ តាមរយៈវេទិកានេះ ក្រៅពីការសិក្សាស្វែងយល់នូវបទបញ្ជាការប្រកួត ក៏ជាឱកាសសម្រាប់សហព័ន្ធ ក្នុងការបញ្ជា្របការផ្សព្វផ្សាយ អំពីយុទ្ធគុនចម្រុះខ្មែរបុរាណផងដែរ ដូចជាគុនល្បុក្កតោ គុនខ្មែរ និងគុនចំបាប់បុរាណជាដើម ដែលសហព័ន្ធបានប្រើប្រាស់ច្របាច់បញ្ចូលគ្នា ជាមួយយុទ្ធគុនចម្រុះទំនើប ដើម្បីផ្លាស់ប្ដូរ និងដកស្រង់បទពិសោធន៍គ្នាទៅវិញទៅមក ជាមួយបណ្ដាប្រទេសផ្សេងៗផង និងផ្សព្វផ្សាយក្បាច់គុណអត្តសញ្ញាណជាតិខ្មែរផង ដើម្បីជំរុញវិស័យកីឡាយុទ្ធគុនចម្រុះកម្ពុជាឲ្យកាន់តែរីកចម្រើន។

គួរដឹងថា វគ្គបណ្ដុះបណ្ដាលអាជ្ញាកណ្ដាល និងគ្រូបង្វឹកយុទ្ធគុនចម្រុះកម្រិតទ្វីបអាស៊ី ដែលរៀបចំដោយ OCA និង AMMA ខាងលើគឺមានប្រតិភូចូលរួមតាមរយៈបណ្ដាគណៈកម្មាធិការជាតិអូឡាំពិកចំនួន ៣០ប្រទេសក្នុងតំបន់អាស៊ី ស្មើនឹងសិក្ខាកាមចំនួន ១១៩នាក់ចូលរួម ក្នុងនោះក៏មានប្រតិភូសហព័ន្ធយុទ្ធគុនចម្រុះកម្ពុជា ៤រូបផងដែរ ដែលដឹកនាំដោយលោក ជឹម ធារ៉ា រួមជាមួយលោក ស៊ុន ចាន់បូរី ដែលចូលវគ្គបណ្ដុះបណ្ដាលអាជ្ញាកណ្ដាល ព្រមទាំងលោក ធឿន ដានី និងកញ្ញា ចេង ដាលីន ចូលរួមវគ្គបណ្ដុះបន្ដាលគ្រូបង្វឹក៕