(ភ្នំពេញ)៖ សាលាញូវហ្គេតវ៉េអន្តរជាតិ បានប្រារព្ធពិធីប្រគល់សញ្ញាបត្របញ្ចប់ការសិក្សា ដល់សិស្សានុសិស្ស ប្រមាណ៦៨៥នាក់ ដែលបានបញ្ចប់ការសិក្សាដោយជោគជ័យ ចាប់ពីថ្នាក់មត្តេយ្យ ដល់ថ្នាក់មធ្យមសិក្សាទុតិយភូមិ សម្រាប់ឆ្នាំសិក្សា២០២៤-២០២៥ ថ្នាក់ចំណេះទូទៅភាសាអង់គ្លេស ចំណេះទូទៅភាសាខ្មែរ និងភាសាចិន។

ពិធីប្រគល់សញ្ញាបត្របញ្ចប់ការសិក្សានេះ បានរៀបចំឡើងនាថ្ងៃទី២៣ ខែសីហា ឆ្នាំ២០២៥នេះ ក្រោមអធិបតីភាពដ៏ខ្ពង់ខ្ពស់របស់ អ្នកឧកញ៉ាបណ្ឌិត ប៊ុន ណារី ប្រធានក្រុមប្រឹក្សាភិបាល និងជាអគ្គនាយិកា នៃសាលាញូវហ្គេតវ៉េអន្តរជាតិ ព្រមទាំងគណៈគ្រប់គ្រង លោកគ្រូ អ្នកគ្រូ បុគ្គលិកសិក្សា សិស្សានុសិស្ស និងអ្នកអាណាព្យាបាលសិស្សយ៉ាងច្រើនកុះករ។ក្នុងចំណោមសិស្សដែលបញ្ចប់ការសិក្សាទាំងជិត៧០០ នាក់ ក្នុងនោះសិស្សប្រមាណ៦៧នាក់ ទទួលបានពានរង្វាន់សិស្សឆ្នើម និងទទួលបានប្រាក់រង្វាន់លើកទឹកចិត្តចំនួន៤០ម៉ឺនរៀលពីសាលាញូវហ្គេតវ៉េអន្តរជាតិផងដែរ។

ក្នុងពិធីប្រគល់សញ្ញាបត្របញ្ចប់ការសិក្សានេះ អ្នកឧកញ៉ា បណ្ឌិត ប៊ុន ណារី ប្រធានក្រុមប្រឹក្សាភិបាល និងជាអគ្គនាយិកា នៃសាលាញូវហ្គេតវ៉េអន្តរជាតិ បានសម្តែងការអបអរសាទរចំពោះសិស្សានុសិស្សទាំងអស់ដែលទទួលបានភាពជោគជ័យក្នុងការសិក្សា និងទទួលបានលទ្ធផលល្អ។

អ្នកឧកញ៉ា បន្ថែមថា ភាពជោគជ័យរបស់សិស្សានុសិស្សនៅថ្ងៃនេះ គឺសបញ្ជាក់ឱ្យឃើញពីកិច្ចខិតខំប្រឹងប្រែងរបស់សាលា លោកគ្រូ អ្នកគ្រូ អ្នកអាណាព្យាបាល និងសិស្សានុសិស្សខ្លួនឯងផ្ទាល់។

អ្នកឧកញ៉ា លើកទឹកដល់សិស្សានុសិស្សទាំងអស់បន្តខិតខំរៀនសូត្រ ដើម្បីលើកស្ទួយកិត្តិយសគ្រួសារ និងចូលរួមចំណែកអភិវឌ្ឍន៍ប្រទេសជាតិ នាពេលអនាគត។

អ្នកឧកញ៉ា បណ្ឌិត ប៊ុន ណារី មានប្រសាសន៍ថា «សូមអរគុណចំពោះគណៈគ្រប់គ្រងសាលា លោកគ្រូអ្នកគ្រូទាំង៣ភាសា ដែលបានចំណាយកម្លាំងកាយចិត្តក្នុងការណែនាំ និងបង្ហាត់បង្រៀនដល់សិស្សានុសិស្សដើម្បីឱ្យពួកគេក្លាយជាសិស្សពូកែ»។

ដើម្បីជាលើកទឹកចិត្តដល់សិស្សានុសិស្សដែលបានបញ្ចប់ការសិក្សាដោយជោគជ័យ ចំពោះសិស្សឆ្នើមចំណាត់លេខ១ទទួលបានប្រាក់រង្វាន់លើកទឹកចិត្តចំនួន៤០ម៉ឺនរៀល។ ដោយឡែកសិស្សថ្នាក់ទី១២ ដែលទទួលបាននិទ្ទេសA នឹងទទួលបានប្រាក់រង្វាន់ ២លានរៀល និទ្ទេស B ទទួលបាន១លាន២សែនរៀល និងនិទ្ទេស C ទទួលបានទឹកប្រាក់ចំនួន៨០ម៉ឺនរៀល។ ចំណែកនិទ្ទេស D និង E ក៏ទទួលបានប្រាក់រង្វាន់ចំនួន២០ម៉ឺនរៀលផងដែរ។

ឪពុកម្តាយ អ្នកអាណាព្យាសិស្សដែលមកអបអរកូនក្នុងថ្ងៃបញ្ចប់ការសិក្សា បានសម្តែងនូវអារម្មណ៍រីករាយ ដែលកូនរបស់ពួកគាត់ទទួលបានលទ្ធផលល្អពីការរៀនសូត្រ។ ដោយពួកគាត់ កត់សម្គាស់ថា បន្ទាប់ពីបានបញ្ជូនកូនឱ្យមកសិក្សាសនៅសាលាញូវហ្គេតវ៉េអន្តរជាតិ សមត្ថភាពនៃការសិក្សាកូនរបស់កូន កាន់តែប្រសើរឡើង ទាំង៣ភាសា គឺភាសាខ្មែរ ភាសាចិន និងភាសាអង់គ្លេស។ ការរីកចម្រើនរបស់កូនៗ គឺដោយសារតែយកចិត្តទុកដាក់ក្នុងការបង្រៀនរបស់លោកគ្រូ អ្នកគ្រូ ក៏ដូចជាបរិយាកាសក្នុងការសិក្សាផងដែរ។

សូមជម្រាបថា គិតមកទល់បច្ចុប្បន្ននេះ សាលាញូវហ្គេតវ៉េអន្តរជាតិ មានបីសាខា រួមមានសាខាទី១ ស្ថិតនៅជិត ផ្សារដេប៉ូ សង្កាត់វាលវង់ ខណ្ឌ៧មករា សាខាទី២ ស្ថិតនៅជិតផ្សារឈូកមាស ខណ្ឌសែនសុខ និងសាខាទី៣ស្ថិតនៅផ្លូវ១៣៩ សង្កាត់វាលវង់ ខណ្ឌ៧មករា រាជធានីភ្នំពេញ ស្ថិតនៅទល់មុខវិទ្យាស្ថានម្ហូបអាហារកម្ពុជា។សម្រាប់ព័ត៌មានបន្ថែមសូមទាក់ទងតាមរយៈទូរស័ព្ទលេខ៖ ០១៧ ៧១៧ ៨៧៩ ឬ Facebook Messenger «New Gateway International School»៕