(ភ្នំពេញ)៖ ក្រុមព្រះខ័នរាជស្វាយរៀង បានបន្ថែម ៣ពិន្ទុពេញ ក្នុងការប្រកួតទី៣ របស់ខ្លួន នៃលីគកំពូលកម្ពុជា ឆ្នាំ២០២៥/២៦ ក្រោយបន្ដយកឈ្នះក្រុមបឹងកេត ៣-០ កាលពីចុងសប្ដាហ៍កន្លងទៅ ដែលធ្វើឲ្យអ្នកគាំទ្រផ្ទុះការចាប់អារម្មណ៍ និងស្ទើរមិនគួរឲ្យជឿ ដែលក្រុមការពារតំណែងជើងឯកនេះ បានរក្សានូវជ័យជម្នះ ដោយលទ្ធផល ៣-០ ចំនួន ៣ប្រកួតជាប់គ្នា ស្របពេលក្រុមជើងឯករងឆ្នាំចាស់ ភ្នំពេញក្រោន នៅមិនទាន់ស្គាល់ជ័យជម្នះនៅឡើយ។

ជំនួបជើងទី១ នៅពហុកីឡដ្ឋានជាតិមរតកតេជោ រវាងព្រះខ័នរាជស្វាយរៀង និងបឹងកេត ខាងលើ ត្រឹមរយៈពេល ៥នាទី កីឡាករ Peprah Kwame បានស៊ុតបំប៉ោងសំណាញ់ទីក្រុមភ្ញៀវបឹងកេត ២គ្រាប់ ហើយលទ្ធផលនេះ បានរក្សារហូតដល់ចុងម៉ោង ទើបកីឡាករ សឿយ វិសាល រកបានគ្រាប់ទី៣ បន្ថែមនៅនាទី៨៣ ដែលជួយឲ្យក្រុមព្រះខ័នរាជស្វាយរៀង ធានាបាននូវជ័យជម្នះ ៣-០ លើក្រុមបឹងកេត ហើយក៏ជាលើកទី៣ ដែលពួកគេ បានយកឈ្នះគូប្រជែង ក្នុងលទ្ធផល ៣-០ នាដើមរដូវកាលថ្មីនេះផងដែរ។

ជាមួយការរក្សាបាននូវ Clean Sheet អមជ័យជម្នះ ៣-០ រហូតដល់ ៣ប្រកួតជាប់គ្នានេះ ពិតជាធ្វើឲ្យអ្នកគាំទ្រចាប់អារម្មណ៍ជាខ្លាំង ក្រោមការដឹកនាំរបស់គ្រូបង្វឹកថ្មី លោក Mattew Mcconkey ដ្បិតលោកក៏ភ្ញាក់ផ្អើលចំពោះលទ្ធផលនេះដូចគ្នា ក្រោយប្រកួតទី១ ឈ្នះក្រុមភ្ញៀវណាហ្គាវើលដ៏ ៣-០ និងបន្ដឈ្នះអង្គរថាយហ្គឺរ ក្រៅដី ៣-០ ។ មិនតែប៉ុណ្ណោះ ក្នុងការប្រកួតដំបូង នៃជើងឯកក្លិបបាល់ទាត់អាស៊ីអាគ្នេយ៍ ឆ្នាំ២០២៥/២៦ ពូលB ព្រះខ័នរាជស្វាយរៀង ក៏ទើបយកឈ្នះក្រុមម្ចាស់ផ្ទះ Shan United របស់មីយ៉ាន់ម៉ា ដោយលទ្ធផល ៣-០ ផងដែរ។

ក្រឡេកទៅចាប់អារម្មណ៍ក្រុមភ្នំពេញក្រោនវិញ ជាមួយលទ្ធផល ២ប្រកួតដំបូង ក្នុងរដូវកាលថ្មី ពួកគេនៅមិនទាន់ស្គាល់ជ័យជម្នះនោះទេ ក្រោយបន្ដប្រកួតស្មើក្រុមកងយោធពលខេមរភូមិន្ទ ១-១ បន្ទាប់ពីប្រកួតដំបូង ស្មើក្រុមបឹងកេត ០-០ ។ សម្រាប់ការប្រកួតទី២ កាលពីចុងសប្ដាហ៍កន្លងទៅ ក្រុមសិង្ហក្រហមនេះ ស្ទើរបាត់បង់ពិន្ទុ បន្ទាប់ពកីឡាករ Ryosuke Meada រកគ្រាប់បាល់នាំមុខឲ្យក្រុមកងយោធពលខេមរភូមិន្ទ តាំងពីនាទី៣៧ រហូតដល់ចុងម៉ោង ទើបកីឡាករ Maksym Priadun រកបានគ្រាប់តាមស្មើ នៅនាទី៩០ ដើម្បីរក្សាកំណត់ត្រាមិនស្គាល់ចាញ់រៀងខ្លួន។

គិតត្រឹមសប្ដាហ៍ទី៣ នៃលីគកំពូលកម្ពុជាឆ្នាំនេះ ក្រុមព្រះខ័នរាជស្វាយរៀង កំពុងឈរកំពូលតារាង ដោយរកបាន ៩ពិន្ទុពេញ តាមពីក្រោយដោយក្រុមអង្គរថាយហ្គឺរ រកបាន ៦ពិន្ទុ ឈរលេខ២ និងក្រុមកងយោធពលខេមរភូមិន្ទ ឈរលេខ៣ រកបាន ៥ពិន្ទុ គ្រាដែលក្រុមវិសាខា, ណាហ្គាវើលដ៏, អឹមអូអាយ កំពង់ដេវ៉ា និងបឹងកេត រកបាន ៤ពិន្ទុស្មើគ្នា ក្រោយឆ្លងកាត់ ៣ប្រកួតឈ្នះ ១ ស្មើ ១ និងចាញ់ ១៕