(បរទេស)៖ ចិន ទើបតែសម្រេចបានការធ្វើតេស្តដ៏អស្ចារ្យមួយ ដែលមើលទៅដូចជានៅក្នុងភាពយន្តបែបវិទ្យាសាស្ត្រ ប៉ុន្តែនេះជាការពិត ពោលគឺសម្រេចបានដោយជោគជ័យនូវការហៅទូរស័ព្ទជាវីដេអូតាមបច្ចេកវិទ្យា 5G ដំបូងបង្អស់នៅលើពិភពលោកដោយភ្ជាប់រវាងផ្កាយរណបទៅស្មាតហ្វូន ដោយប្រើតែទូរស័ព្ទធម្មតា ពោលមិនចាំបាច់មានឧបករណ៍ភ្ជាប់ផ្កាយរណបអ្វីទាំងអស់។

ការរីកចម្រើនដ៏ធំនេះ ត្រូវបានគាំទ្រដោយស្តង់ដារ 5G Non-Terrestrial Network (NTN) ជាសកល ដែលមានន័យថា នៅពេលអនាគត អ៊ីនធឺណិតតាមផ្កាយរណបអាចភ្ជាប់ទៅនឹងស្មាតហ្វូនធម្មតារបស់មនុស្សគ្រប់រូបនៅជុំវិញពិភពលោកបានយ៉ាងរលូន។ វាជាផ្នែកមួយនៃគម្រោង «Guowang megaconstellation» របស់ចិន ដែលមានគោលបំណងបញ្ជូនផ្កាយរណបចំនួន ១៣,០០០ឡើងលើអាកាស ដើម្បីផ្តល់សេវាភ្ជាប់បណ្តាញសកលពិតប្រាកដ ចាប់ពីទីក្រុងដែលពោរពេញដោយអគារខ្ពស់ រហូតដល់ភូមិដាច់ស្រយាលដូចជានៅតំបន់ភ្នំជាដើម។

សូមស្រម៉ៃមើលថាអ្នកអាចផ្សាយផ្ទាល់ (live-stream) ពីកន្លែងណាក៏បាន ដោយមិនចាំបាច់ពឹងផ្អែកលើប្រព័ន្ធបណ្តាញទូរសព្ទដៃឡើយ។ ទោះបីជាយ៉ាងណា វានៅមានបញ្ហាមួយចំនួនដូចជា ល្បឿន ការគ្រប់គ្រង និងសមត្ថភាពដែលត្រូវដោះស្រាយបន្តទៀត តែវាក៏ជាជោគជ័យដែលបង្ហាញពីអនាគត៕