(ភ្នំពេញ)៖ ធនាគារ វឌ្ឍនៈ បានរៀបចំវេទិកាយល់ដឹង ស្តីពី «សុវត្ថិភាព ែតាមអ៊ីនធឺណិត ចាប់ផ្តើមពីផ្ទះ» ដែលប្រមូលផ្តុំនូវអ្នកជំនាញពីវិស័យអប់រំ បច្ចេកវិទ្យា និងធនាគារ ដើម្បីពិភាក្សាគ្នាពីសារៈសំខាន់នៃសុវត្ថិភាពតាមប្រព័ន្ធអនឡាញ ក៏ដូចជាចែករំលែកនូវទស្សនៈ និង លើកកម្ពស់សហគមន៍ តាមរយៈចំណេះដឹង និងឧបករណ៍សម្រាប់កុមារ និងមនុស្សពេញវ័យក្នុងការការពារខ្លួន ក្នុងសម័យពិភពឌីជីថលសព្វថ្ងៃនេះ។

វេទិកានេះបានរៀបចំឡើងថ្ងៃទី២២ ខែសីហា ឆ្នាំ២០២៥ នៅសាលប្រជុំ The Atom ក្នុងអគារប្រណីត វឌ្ឍនៈ កាពីតាល។ វេទិកានេះក៏មានការចែករំលែកទស្សនៈដ៏មានអត្ថន័យ ពីសំណាក់អ្នកជំនាញពីតំណាងក្រុមហ៊ុនដូចជា ធនាគារ វឌ្ឍនៈ; First Cambodia; Biplan Global; Proseth Solutions; The King’s School Vattanac Ville និង CABS Consulting ។

វាគ្មិននីមួយៗ បានលើកឡើង ពីចំណុច សំខាន់មួយចំនួនដូចជា៖

- សុវត្ថិភាពតាមអ៊ីនធឺណិត ចាប់ផ្តើមពីផ្ទះ៖ គ្រួសារនីមួយៗ គួរតែយល់ថាកូនៗជាទីស្រឡាញ់កំពុងតែប្រឈមទៅនឹងហានិភ័យណាមួយដែលអាចកើតឡើងតាមប្រព័ន្ធអនឡាញ និងត្រូវតែផ្តល់ឲ្យពួកគេនូវចំណេះដឹងផ្នែកប្រព័ន្ធឌីជីថលចាប់តាំងពីកុមារ។
- ការបង្កើតនូវប្រព័ន្ធសុវត្ថិភាពនៅគ្រប់មជ្ឈដ្ឋាន៖ រាប់ចាប់តាំងពីឧបករណ៍អេឡិចត្រូនិច ប្រើប្រាស់ផ្ទាល់ខ្លួន រហូតដល់ឧបករណ៍ផ្សេងៗដែលប្រើប្រាស់នៅតាមស្ថាប័ននានា ត្រូវតែបំពាក់នូវប្រព័ន្ធការពារសុវត្ថិភាព។
- ការអនុវត្តការការពារ៖ ទាំងបុគ្គល និងស្ថាប័នត្រូវតែការពារឲ្យបានខ្ជាប់ខ្ជួន ដើម្បីទប់ស្កាត់ពីហានិភ័យ និងត្រៀមខ្លួនរួចជាស្រេចក្នុងការប្រឈមមុខនឹង ហានិភ័យដែល អាចកើតមានឡើង ។
- ការចូលរួមពីគ្រប់មជ្ឍដ្ឋាន៖ ស្ថាប័នអប់រំ ទីតាំងអាជីវកម្ម ធនាគារ ត្រូវតែចូលរួមក្នុង ទំនួល ខុសត្រូវរួម ក្នុងការអប់រំ និងការពារសហគមន៍ប្រឆាំងនឹងការឆបោកតាមប្រព័ន្ធឌីជីថល។

លោកបណ្ឌិត Anthony Chin អគ្គនាយកប្រតិបត្តិនៃធនាគារ វឌ្ឍនៈ បានមានប្រសាសន៍ថា ​«នៅពេលដែលបច្ចេកវិទ្យាកំពុងលូតលាស់ ការការពារខ្លួនយើងពីប្រព័ន្ធអនឡាញបានក្លាយជាទំនួលខុសត្រូវរួម។ នៅធនាគារ វឌ្ឍនៈ ពួកយើងប្តេជ្ញាចិត្តក្នុងការការពារអតិថិជន និងក្រុមគ្រួសារ មិនត្រឹមតែតាមរយៈការចែករំលែកនូវចំណេះដឹងនោះទេ ថែមទាំងចូលរួមលើកកម្ពស់សហគមន៍របស់យើង​ តាមរយៈការផ្តល់ជូននូវមុខងារសំខាន់ៗដើម្បីការពារខ្លួន។ ស្ថិតនៅក្នុងសម័យឌីជីថល កូនៗ ជាទីស្រឡាញ់របស់យើងកំពុងតែរស់នៅក្នុងពិភពឌីជីថលដែលកំពុងលូតលាស់ ប៉ុន្តែពួកគេ មិនមានច្រើននោះទេដែលបានស្គាល់ច្បាស់ពីហានិភ័យដែលអាចកើតមានឡើងតាមប្រព័ន្ធអនឡាញ។ ដូច្នេះហើយ ទើបសុវត្ថិភាពតាមអ៊ីនធឺណិតចាប់ផ្តើមពីផ្ទះ»។​

​ក្នុងវេទិកានេះដែរ ក៏បានដាក់សម្ពោធឲ្យប្រើប្រាស់ជាផ្លូវការមុខងារ បិទបន្ទាន់ ឬ Block Now ជាមុខងារថ្មីនៅលើ VB App ដែលទទួលបានពានរង្វាន់ ហើយជាមួយនឹងមុខងារពិសេសនេះ អាចអនុញ្ញាតឲ្យអតិថិជនអាចបិទប្រតិបត្តិការចេញពីគណនី និងកាតបានភ្លាមៗ ប្រសិនបើសង្ស័យថាមានការក្លែងបន្លំណាមួយ។ មុខងារបិទបន្ទាន់នេះ ជាមុខងារថ្មីដំបូងគេបង្អស់ក្នុងប្រទេសកម្ពុជា ដែលធ្វើឲ្យអ្នកប្រើប្រាស់អាចទប់ទល់ និងការពារស្ថានការណ៍ផ្សេងៗបានដោយខ្លួនឯង គ្រប់ពេលវេលា គ្រប់ទីកន្លែង ជាមួយនឹងទំនុកចិត្ត និងសុវត្ថិភាពខ្ពស់។

ធនាគារវឌ្ឍនៈ ក៏សូមថ្លែងអំណរគុណយ៉ាងជ្រាលជ្រៅទៅកាន់ក្រុមហ៊ុន First Cambodia, Biplan Global និង Proseth Solutions ដែលបានចូលរួម ឧបត្ថម្ភក្នុងវេទិកានេះ។

វេទិកាស្តីពី «សុវត្ថិភាពតាមអ៊ីនធឺណិត ចាប់ផ្តើមពីផ្ទះ» បានឆ្លុះបញ្ចាំងពីការប្តេជ្ញាចិត្តរបស់ធនាគារ វឌ្ឍនៈ ក្នុងការការពារអតិថិជន ចែករំលែកនូវចំណេះដឹងតាមប្រព័ន្ធឌីជីថល ក៏ដូចជាការចូលរួមក្នុងសហគមន៍។ ធនាគារ វឌ្ឍនៈ នឹងបន្តលើកកម្ពស់ការការពារ និងសុវត្ថិភាពរបស់អតិថិជន ព្រមទាំងពង្រឹងតួនាទីរបស់ធនាគារ ក្នុងនាមជាធនាគារពាណិជ្ជកូនខ្មែរសុទ្ធសាធ ដែលផ្តល់តម្លៃទៅលើ គំនិត ច្នៃប្រឌិត និងសហគមន៍របស់យើង​៕