Apple ត្រៀមនាំយកស្រោម Bumper មកវិញ សម្រាប់ iPhone 17
26-08-2025 09:21
(បរទេស)៖ យោងតាមលោក Mark Gurman អ្នកសារព័ត៌មានល្បីឈ្មោះរបស់ Bloomberg បានឲ្យដឹងថា ក្រុមហ៊ុន Apple កំពុងពិចារណាបង្កើតស្រោមទូរស័ព្ទប្រភេទ Bumper ឡើងវិញសម្រាប់ម៉ូដែល iPhone 17 នាពេលខាងមុខ។ ព័ត៌មាននេះត្រូវបានចុះផ្សាយដោយ Apple Insider នៅថ្ងៃទី ២៥ ខែសីហា ឆ្នាំ២០២៥។
ស្រោម Bumper មានលក្ខណៈពិសេសត្រង់ថា វាគ្រាន់តែការពារតែគែមជុំវិញទូរស័ព្ទប៉ុណ្ណោះ ទុកឲ្យផ្ទៃខាងមុខ និងខាងក្រោយនៅចំហដើម្បីបង្ហាញពីភាពស្រស់ស្អាតដើមរបស់ iPhone។ ស្រោមប្រភេទនេះធ្លាប់ពេញនិយមខ្លាំងកាលពីឆ្នាំ ២០១០ សម្រាប់ម៉ូដែល iPhone 4។
ទោះបីជាការទុកខ្នងទូរស័ព្ទចំហអាចធ្វើឲ្យអ្នកប្រើប្រាស់មួយចំនួនបារម្ភពីការកោសឆ្កូតក្ដី ស្រោម Bumper នៅតែអាចការពារបានយ៉ាងមានប្រសិទ្ធភាព។ គែមរបស់វាត្រូវបានរចនាឲ្យលយខ្ពស់ជាងអេក្រង់ និងខ្នងទូរស័ព្ទ ដើម្បីការពារមិនឲ្យផ្ទៃទាំងពីរប៉ះផ្ទាល់ជាមួយនឹងផ្ទៃរាបស្មើ។ លើសពីនេះ ការរចនាបែបនេះក៏អាចជួយសម្រួលដល់ការប្រើប្រាស់ជាមួយនឹងម៉ូដែល iPhone 17 ដែលគេរំពឹងថានឹងមានកាមេរ៉ាលយផងដែរ៕
