(ញូវយ៉ក)៖ កីឡាករវាយកូនបាល់ទោល Coleman Wong បានក្លាយជាកីឡាករហុងកុងដំបូងគេ ដែលទទួលបានជ័យជម្នះនៅថ្ងៃបើកឆាកកម្មវិធីធំ US Open 2025 ដែលមានអាមេរិកធ្វើម្ចាស់ផ្ទះ។ នេះបើយោងតាមការចេញផ្សាយដោយ BBC។

បុរសវ័យទើបតែ ២១ឆ្នាំដែលបានឆ្លងផុតវគ្គជម្រុះ ដើម្បីឡើងមកលេងជុំចុងក្រោយនៃក្របខណ្ឌ Grand Slam មួយនេះ បានផ្តួលគូប្រជែងដោយលទ្ធផល ៣ទល់នឹង០ ជាមួយនឹងលំដាប់ពិន្ទុ ៦-៤ ៧-៥ និង ៧-៦ (៧-៤) នារាត្រីថ្ងៃចន្ទ ទី២៥ ខែសីហា (ម៉ោងនៅកម្ពុជា) នៅឯទីលាន Flushing Meadows ស្ថិតក្នុងទីក្រុង New York។

ជាមួយគ្នានេះ កីឡាការិនីទៅពីតំបន់អាស៊ីដូចគ្នា គឺ Alexandra Eala សញ្ជាតិហ្វីលីពីនក៏បានបង្កើតប្រវត្តិសាស្ត្រក្នុងកម្រិត Grand Slam នេះ កាលពីថ្ងៃអាទិត្យ ដោយនាងបានឈានដល់ជុំទី២ នៃការប្រកួត US Open កម្រិតខ្ពស់នេះជាលើកដំបូង ដោយបន្តប៉ះកីឡាការិនីអេស្ប៉ាញ Cristina Bucsa ។

ខណៈ Eala មានវ័យ ២០ឆ្នាំរូបនេះ ក៏ជាម្ចាស់ពានរង្វាន់ US Open juniors 2022 ក្លាយជាកីឡាករហ្វីលីពីនដំបូងគេដែលឈ្នះពានរង្វាន់កម្រិត Grand Slam ឯកត្តជន Junior ។

កីឡាករ Wong ដែលបានចាប់ផ្តើមលេង Tennis តាំងពីអាយុ ៥ឆ្នាំមកនោះ បានទទួលសារអបសាទរផងដែរពីរៀមច្បងដែលបានចូលនិវត្តន៍ Rafael Nadal ក្នុងនាមជាយុវជនថ្នាលចេញពី Nadal’s Mallorca នៅឯប្រទេសអេស្ប៉ាញគិតចាប់តាំងពីគេបានទៅហ្វឹកហាត់នៅទីនោះតាំងពីអាយុ ១៧ឆ្នាំ។

រូបគេនឹងត្រូវពើបប្រទះគូប្រជែង Adam Walton របស់អូស្រា្តលីក្នុងជុំទី២ ជាបន្តទៀតបានថ្លែងដោយក្តីរំភើបឥតឧបមាថា «ខ្ញុំតែងតែទន្ទឹងរង់ចាំថ្ងៃនេះមកដល់ ក៏ព្រោះវាជាអានុស្សាវរីយ៍ដ៏ធំសម្រាប់ខ្ញុំ និងគ្រួសារ ហើយជាពិសេសសម្រាប់ប្រជាជនហុងកុងទាំងមូលតែម្តង ពេលត្រឡប់ទៅផ្ទះវិញ។ វាពិតជាមានន័យជ្រៅខ្លាំងណាស់»៕