(បរទេស)៖ យុវជនវ័យទើបតែ ១៦ឆ្នាំ Rio Ngumola បានបង្កើតប្រវត្តិសាស្រ្តថ្មី ក្នុងនាមកីឡាករទាត់បញ្ចូលទីក្មេងជាងគេប្រចាំក្លិប Liverpool ដែលបានយកឈ្នះម្ចាស់ផ្ទះ Newcastle United ៣-២ យប់មិញនៅកីឡដ្ឋាន St. James’ Park។ នេះបើយោងតាមការចេញផ្សាយដោយ BBC។

ក្រុមការពារតំណែងជើងឯក Premier League រដូវកាលមុន ត្រូវបានសារិកាព្រៃវាយបកតាមស្មើ ២-២ បន្ទាប់ពីនាំមុខ ២គ្រាប់មុនត្រឹមរយៈពេលតែ ៤៦នាទី ប្រចាំសប្តាហ៍ទី២ ជើងទី១ ក្នុងលីគរដូវកាលថ្មី ២០២៥-២៦។

ទោះជាយ៉ាងណា Liverpool ដែលបានយកឈ្នះ AFC Bournemouth ៤-២ នៅថ្ងៃបើកឆាកលីគអង់គ្លេសនោះ ដែលបានដាក់ Ngumohal វ័យ ១៦ឆ្នាំ និង ៣៦១ថ្ងៃចូលលេង ជាអ្នករកបានគ្រាប់ជ័យជម្នះតែម្តងនៅនាទី ៩០+១០ ដ្បិតគូប្រជែង Newcastle លេងតែសមាជិក ១០នាក់ប៉ុណ្ណោះតាំងពីចុងវគ្គទី១ មកម្ល៉េះ។

តាមរយៈ ៣ពិន្ទុក្រៅដីជាលើកដំបូងនេះដែរ បានញាំងឱ្យ Ngumoha ក្លាយជាកីឡាករទី៤ នៅ Premier League ក្មេងជាងគេដែលរកបានគ្រាប់បំប៉ោងសំណាញ់ទី តាមពីក្រោយ James Vaughan, James Milner និង Wayne Rooney ទៀតផង។

Liverpool ជាក្រុមទី៣ នៃលីគអង់គ្លេស Premier League ដើមរដូវកាលនេះ ដែលរកបាន ៦ពិន្ទុស្មើជាមួយក្រុមកំពូលតារាង Arsenal និង Tottenham Hotspur ក្រោយឆ្លងកាត់ ២ប្រកួតឈ្នះដូចគ្នា៕