(ភ្នំពេញ)៖ អ្នកគាំទ្របានកើតការភ្ញាក់ផ្អើល បន្ទាប់ពីលេចវត្តមានកីឡាករកូនកាត់ខ្មែរ-កាដាណា ១រូប ត្រូវបានកោះហៅចូលរួមប្រមូលផ្ដុំហ្វឹកហាត់ក្រុមជម្រើសជាតិយុវជនអាយុក្រោម ២៣ឆ្នាំកម្ពុជា គឺកីឡាករ ឈឿន ដាវីន សមាជិកយុវជនថ្នាលនៃក្លិបលីគកំពូលកាណាដា York United FC ដើម្បីត្រៀមការប្រកួតជម្រុះជើងឯកអាស៊ីយុវជនអាយុក្រោម ២៣ឆ្នាំ (AFC U-23 Asian Cup) ឆ្នាំ២០២៦ ពូលG ចាប់ពីថ្ងៃទី៣-៩ ខែកញ្ញាខាងមុខ ដែលកម្ពុជានឹងធ្វើម្ចាស់ផ្ទះ។

ដំណាលគ្នានឹងការកោះហៅខាងលើ កីឡាករវ័យ ១៨ឆ្នាំ ឈឿន ដាវីន បានសម្ដែងនូវសេចក្ដីរំភើប និងមានកិត្តិយសជាខ្លាំង ដែលមានឱកាសប្រកួតតំណាងប្រទេសកំណើតរបស់ខ្លួន និងគ្រួសារ។ ហើយគេបានចាត់ទុកការប្រកួតជម្រុះពានរង្វាន់ AFC U-23 Asian Cup នាសប្ដាហ៍ក្រោយ គឺជាវេទិកាដ៏អស្ចារ្យមួយ ក្នុងការលេងតំណាងជាតិលើកដំបូង ក៏ដូចជាតំណាងឲ្យប្រជាជនកម្ពុជាទាំងមូល។

ឈឿន ដាវីន បានបញ្ជាក់ថា «វគ្គជម្រុះពានរង្វាន់ AFC U23 Asian Cup នេះ នឹងក្លាយជាការប្រជែងដ៏អស្ចារ្យ។ ខ្ញុំពិតជារំភើបក្នុងការចូលរួម និងលេងតំណាងប្រទេសកំណើតរបស់ខ្ញុំ។ ពេលវេលារបស់ខ្ញុំ នៅក្លិប York United ពិតជាអស្ចារ្យណាស់ ក្នុងការលេងជាមួយកីឡាករកម្រិតខ្ពស់ ដែលមានអាយុខុសៗគ្នា បានជំរុញឲ្យខ្ញុំមានការអភិវឌ្ឍកាន់តែប្រសើរឡើងជារៀងរាល់ថ្ងៃ។ ខ្ញុំនឹងបន្តខិតខំដើម្បីគោលដៅរបស់ខ្ញុំ»។

គួរដឹងថា បញ្ជីរាយនាមកីឡាករក្រុមជម្រើសជាតិ U23 កម្ពុជា ដែលសហព័ន្ធទើបបង្ហាញនាដើមសប្ដាហ៍នេះ គឺមានកីឡាករ ២៦នាក់ ត្រូវបានកោះហៅប្រមូលផ្ដុំហ្វឹកហាត់ត្រៀមធ្វើម្ចាស់ផ្ទះវគ្គជម្រុះជើងឯកយុវជនអាស៊ីខាងលើ ក្រោមការដឹកនាំរបស់គ្រូបង្វឹកជនជាតិជប៉ុន លោក Koji Gyotoku ។ ការប្រកួតជម្រុះពូលG នេះ គឺមានបេក្ខភាព ៤ក្រុមចូលរួម គឺមានកម្ពុជា អ៊ីរ៉ាក់ អូម៉ង់ និងប៉ាគីស្ថាន ខណៈប្រកួតដំបូង ក្រុមគោព្រៃជំទង់កម្ពុជា នឹងត្រូវជួបក្រុម U23 អូម៉ង់ មុនគេ នាថ្ងៃទី៣ ខែកញ្ញា ឆ្នាំ២០២៥ ខាងមុខ៕