(បរទេស)៖ នៅថ្ងៃទី២៥ ខែសីហា ឆ្នាំ២០២៥ លោក Elon Musk និងក្រុមហ៊ុនបច្ចេកវិទ្យាបញ្ញាសិប្បនិមិត្តរបស់លោក គឺ xAI បានដាក់ប្តឹងចោទប្រកាន់ Apple និង OpenAI ចោទពីបទព្យាយាមរារាំងការប្រកួតប្រជែង ដោយប្រើអំណាចក្នុង App Store ដើម្បីជម្រុញ chatbot ChatGPT និងបន្តទម្លាក់ Grok ដែលជា chatbot របស់ xAI ចេញពីទីផ្សារ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី២៦ ខែសីហា ឆ្នាំ២០២៥។

ចំណុចសំខាន់ៗនៃបណ្តឹងនោះ​គឺ លោក Elon Musk បានចោទថា Apple និង OpenAI បានសហការជាមួយគ្នា ដើម្បីបញ្ចូល ChatGPT ជាឯកសិទ្ធិទៅក្នុង iOS និង Siri។ អ្នកប្រើ iPhone មិនអាចជ្រើសរើស AI ផ្សេងទៀតបានទេ ដូចជា Grok របស់ xAI។ xAI បានអះអាងថា Apple បានបញ្ឈប់ការមើលឃើញរបស់ Grok នៅលើ App Store បើទោះបីជាវា បានចំណាត់ថ្នាក់លេខ៣ នៅក្នុងផ្នែក productivity apps ក៏ដោយ។ Grok មិនត្រូវបានបញ្ចូលក្នុងបញ្ជី «Must-Have Apps» ឬផ្នែកផ្សព្វផ្សាយនានា។ Elon Musk ចោទថា Apple និង OpenAI កំពុង «បិទទីផ្សារ» ដោយបង្កើតសម្ព័ន្ធមិនសមរម្យ ដែលជួយពង្រឹងភាពមិនស្មើភាពក្នុងការប្រកួតប្រជែង AI ដ៏កំពុងរីកចម្រើននេះ។

ក្នុងពាក្យបណ្តឹងនេះ xAI ស្នើសុំសំណងជាប្រាក់ច្រើនពាន់លានដុល្លារ និងស្នើសុំឲ្យមានការបញ្ឈប់អាកប្បកិរិយាដែល xAI រៀបរាប់ខាងលើ ដែលប្រឆាំងនឹងច្បាប់ប្រកួតប្រជែង។ ជុំវិញពាក្យបណ្តឹងថា ខាង OpenAI បានថ្លែងឲ្យដឹងថា បណ្តឹងនេះគ្រាន់តែជាផ្នែកមួយដែលនាំឲ្យមានផលរំខាន របស់ Elon Musk ប៉ុណ្ណោះ ដោយបដិសេធសំណុំរឿងនេះថា គ្មានមូលដ្ឋានច្បាប់។ ងាកមក Apple មិនទាន់បានចេញសេចក្តីថ្លែងការណ៍ជាសាធារណៈនៅលើសំណុំបណ្ដឹងនេះឡើយ៕