(ភ្នំពេញ)៖ ស្នាដៃចុងក្រោយរបស់អ្នកនិពន្ធ និងដឹកនាំសម្ដែងឆ្នើមលោក កៅ សីហា មានចំណងជើងថា «ភូមិគ្រឹះអាគម» មុននឹងលោកទទួលមរណភាព ជាវណ្ណកម្មលើកដំបូងរបស់ផលិតកម្ម «ហ្វីមខននើរ» បានធ្វើពិធីបើកសម្ពោធចាក់បញ្ចាំងតាមបណ្ដារោងភាពយន្តនានាហើយ កាលពីល្ងាចថ្ងៃទី២៥ ខែសីហា ឆ្នាំ២០២៥ នេះ នៅផ្សារទំនើប K Mall ផ្លូវវ៉េងស្រេង ដោយមានការអញ្ជើញចូលរួមពីសំណាក់លោក សេម ឡងឌី (Pey Pey Dy) ស្ថាបនិក និងជាផលិតករផលិតកម្ម ហ្វីមខននើរ, លោក លឹម យូសួ អគ្គនាយករង អគ្គនាយកដ្ឋានបច្ចេកទេសវប្បធម៌ នៃក្រសួងវប្បធម៌ និងវិចិត្រសិល្បៈ ព្រមទាំងតារាសម្ដែង, តារាចម្រៀង និងសិល្បករ-សិល្បការិនីយ៉ាងច្រើនកុះករ។

លោក សេម ឡងឌី ហៅ Pey Pey Dy ស្ថាបនិក និងជាផលិតករផលិតកម្ម ហ្វីមខននើរ បានថ្លែងថា មុននឹងបង្ហាញអំពីប្រវត្តិនៃការបង្កើតផលិតកម្ម ហ្វីម ខននើរ និងដំណើរការផលិតខ្សែភាពយន្តខ្មែរខ្នាតធំខាងលើនេះ រូបលោកក្នុងនាមជនជាតិខ្មែរ សូមសម្តែងនូវការឈឺចាប់ និងមរណទុក្ខដ៏ក្រៀមក្រំជាទីបំផុត ជាមួយក្រុមគ្រួសារវីរៈកងទ័ពកម្ពុជាដែលបានពលី របួស ពិការ ក្នុងបុព្វហេតុការពារបូរណភាពទឹកដីក្នុងសង្គ្រាមឈ្លានពានសៀម មកលើអធិបតេយ្យរបស់កម្ពុជា កាលពីថ្ងៃទី២៤ ខែកក្កដា ឆ្នាំ២០២៥ កន្លងទៅនេះ។

លោកសូមរំឭកអំពីប្រវត្តិនៃការបង្កើតផលិតកម្ម ខននើរ ឲ្យមហាជនបានជ្រាបថា ដោយផ្តើមចេញពីឆន្ទៈ និងការស្រលាញ់វិស័យភាពយន្ត លោកនិងក្រុមការងារបានចំណាយពេលអស់ជាច្រើនឆ្នាំ ក្នុងការផលិតមាតិកា និពន្ធ និងដឹកនាំថតខ្សែភាពយន្តខ្លីៗផ្សព្វផ្សាយ នៅលើបណ្តាញសង្គមនានា ដើម្បីចែកជូនមហាជនបានទស្សនាដោយរីករាយ និងទទួលបានសន្ទុះការគាំទ្រពីមហាជន ពិសេសបងប្អូនប្រជាពលរដ្ឋខ្មែរ។ ដោយសារចំណុចទាំងអស់នេះហើយ បានធ្វើឲ្យលោកបន្តក្ដីស្រមៃ មានកម្លាំងកាយកម្លាំងចិត្ត ប្រឹងប្រែងតស៊ូ និងបោះជំហានបន្តិចម្តងៗលើវិស័យភាពយន្ត រហូតជម្រុញចិត្តលោកឲ្យបង្កើតជាផលិតកម្ម ហ្វីម ខននើរ នេះឡើងនៅឆ្នាំ២០២៤។

លោក ប៉ីប៉ីឌី បានគូសរំលេចថា គោលបំណងនៃការបង្កើតផលិតកម្មនេះ គឺដើម្បីចូលរួមលើកស្ទួយ និងអភិវឌ្ឍន៍វិស័យភាពយន្ត ក៏ដូចជាឧស្សាហកម្មភាពយន្តនៅកម្ពុជាកាន់តែមានគុណភាពល្អ និងស្របតាមគោលនយោបាយរបស់ក្រសួងវប្បធម៌ និងវិចិត្រសិល្បៈ ក្នុងការអភិវឌ្ឍវិស័យភាពយន្តខ្មែរកាន់តែរីកចម្រើន។ ម្យ៉ាងទៀតជម្រុញដល់ប្រជាជនកម្ពុជា ងាកមកគាំទ្រវិស័យភាពយន្តខ្មែរខ្នាតធំឲ្យកាន់តែខ្លាំងឡើង និងអាចឈានទៅប្រកួតប្រជែងទីផ្សារភាពយន្ត ជាមួយប្រទេសជិតខាងបន្ថែមទៀត។

ខ្សែភាពយន្តដែលត្រូវបានផលិតឡើងដំបូងគេរបស់ផលិតកម្ម ហ្វីម ខននើរនេះ មានចំណងជើងថា «ភូមិគ្រឹះអាគម» ហើយខ្សែភាពយន្តនេះ ដឹកនាំរឿង និងនិពន្ធសាច់រឿងដោយរូបលោកផ្ទាល់ និងលោក យូ សុភា និងប្រឹក្សាដឹកនាំរឿងដោយលោក កៅ សីហា និងលោកទ្រី សក្កដា ព្រមទាំងក្រុមការងារជាច្រើនរូបទៀត ដោយចំណាយពេលវេលាផលិតអស់រយៈពេលជាង១ឆ្នាំ លាយឡំជាមួយឧបសគ្គជាច្រើន ទើបសម្រេចបានសមិទ្ធផល ដែលយើងនឹងចាក់បញ្ចាំងជូនទស្សនិកជន និងភ្ញៀវកិត្តិយសទស្សនានាពេលនេះ។ ក្រោយពេលបញ្ចប់ការសម្ពោធជាផ្លូវការ ខ្សែភាពយន្តខ្មែរខ្នាតធំនេះ នឹងចាក់បញ្ចាំងនៅថ្ងៃទី២៨ ខែសីហា ឆ្នាំ២០២៥ ខាងមុខនេះ នៅតាមរោងភាពយន្តក្នុងរាជធានីភ្នំពេញ និងតាមបណ្តាខេត្តនានាក្នុងប្រទេសកម្ពុជា។

ជាមួយនឹងការដាក់បញ្ចាំងស្នាដៃចុងក្រោយ របស់អ្នកដឹកនាំសម្ដែងលោក កៅ សីហា ដែលបានទទួលមរណភាពទៅហើយនោះ សម្រាប់លោក ប៉ីប៉ីឌី បានសម្ដែងនូវក្ដីអាឡោះអាល័យ និងរំឭកនូវការងារផ្ដល់ឲ្យនូវបទពិសោធផលិតភាពយន្ត និងដឹកនាំសម្ដែងពីសំណាក់លោក កៅ សីហា ដោយបានបង្ហាត់បង្រៀនដល់ផលិតករជំនាន់ក្រោយ ដោយឥតលាក់លៀម និងបង្ហាញពីការសប្បាយចិត្ត ដែលឃើញប្អូនៗជំនាន់ក្រោយ ចេះប្រឹងប្រែងតស៊ូលើកស្ទួយវិស័យភាពយន្តខ្មែរ។ តាមរយៈភាពយន្តនេះលោក ប៉ីប៉ីឌី សូមឧទ្ទិសជូនដល់វិញ្ញាណក្ខន្ធរបស់លោក កៅ សីហា និងសូមឲ្យលោកបានទៅកាន់ទីឋានបរមសុខកុំបីឃ្លៀងឃ្លាតឡើយ។

សូមបញ្ជាក់ថា ផលិតកម្ម «ហ្វីមខននើរ» សង្ឃឹមយ៉ាងមុតមាំ និងជឿជាក់លើមហាជនខ្មែរទាំងអស់ ក្នុងការគាំទ្រនូវគ្រប់ខ្សែភាពយន្តខ្មែរខ្នាតធំ ដែលបង្កើតឡើងដោយកូនខ្មែរ ដើម្បីធ្វើយ៉ាងណាឲ្យវិស័យភាពយន្តខ្មែរ អភិវឌ្ឍន៍យ៉ាងឆាប់រហ័ស និងឈានទៅប្រកួតប្រជែងនៅលើទីផ្សារអន្តរជាតិនាពេលខាងមុខ៕