(បរទេស)៖ តម្លៃភាគហ៊ុនរបស់ក្រុមហ៊ុនផលិតរថយន្តជប៉ុន Nissan បានធ្លាក់ចុះយ៉ាងគំហុកប្រមាណ ៦% នៅថ្ងៃអង្គារនេះ បន្ទាប់ពីក្រុមហ៊ុន Mercedes-Benz ដែលជាម្ចាស់ភាគហ៊ុនធំលំដាប់ទីពីរ បានប្រកាសលក់ភាគហ៊ុនទាំងអស់របស់ខ្លួនក្នុងតម្លៃប្រមាណ ៣៤៦ លានដុល្លារ ឬស្មើនឹង ៣,៨% នៃភាគហ៊ុនសរុប។ នេះបើយោងតាមទីភ្នាក់ងារសារព័ត៌មាន Reuters នៅថ្ងៃទី២៦ ខែសីហា ឆ្នាំ២០២៥។

ការធ្លាក់ចុះនៃភាគហ៊ុននេះបានធ្វើឱ្យវិនិយោគិនកាន់តែមិនជឿជាក់លើលទ្ធភាពនៃការងើបឡើងវិញរបស់ក្រុមហ៊ុន Nissan ដែលកំពុងប្រឈមនឹងបញ្ហាជាច្រើន រួមមាន៖ ការបាត់បង់ប្រាក់ ៥៣៥ លានដុល្លារ គិតត្រឹមត្រីមាសទី២ ឆ្នាំនេះ, បញ្ហាពន្ធគយ និងការធ្លាក់ចុះការលក់យ៉ាងខ្លាំងនៅទីផ្សារសំខាន់ៗដូចជា សហរដ្ឋអាមេរិក និងចិន។

យ៉ាងណាមិញ លោក Ivan Espinosa នាយកប្រតិបត្តិថ្មីរបស់ក្រុមហ៊ុន បានប្រកាសផែនការកែទម្រង់ទ្រង់ទ្រាយធំ រួមទាំងការកាត់បន្ថយការផលិត និងរោងចក្រ ដើម្បីស្តារប្រាក់ចំណេញឡើងវិញ។ ផែនការនេះរួមមានការកាត់បន្ថយសមត្ថភាពផលិតទូទាំងពិភពលោកពី ៣,៥ លានគ្រឿង មកត្រឹម ២,៥ លានគ្រឿង និងកាត់បន្ថយរោងចក្រផលិតពី ១៧ កន្លែង មកត្រឹម ១០ កន្លែងត្រឹមឆ្នាំសារពើពន្ធ ២០២៧។

អ្នកនាំពាក្យរបស់ក្រុមហ៊ុន Mercedes-Benz បានបញ្ជាក់ថា ការលក់ភាគហ៊ុននេះ មិនមែនជាការសម្រេចចិត្តដោយយុទ្ធសាស្ត្រនោះទេ តែគ្រាន់តែជាការរៀបចំផលប័ត្រវិនិយោគឡើងវិញតែប៉ុណ្ណោះ។ បច្ចុប្បន្ន តម្លៃភាគហ៊ុនរបស់ Nissan បានធ្លាក់ចុះដល់ ៣៤១ យ៉េន (ប្រហែល ២,៣១ ដុល្លារ) ដែលជាការធ្លាក់ចុះខ្លាំងបំផុតក្នុងមួយថ្ងៃ គិតចាប់តាំងពីដើមខែកក្កដាមក៕