(ម៉ិកស៊ិក)៖ កីឡាករប្រដាល់សកលសញ្ជាតិម៉ិកស៊ិក Julio Cesar Chavez Jr ថ្មីៗនេះ បានត្រលប់មកហ្វឹកហាត់វិញហើយ បន្ទាប់ពីរូបគេត្រូវបានដោះលែងពីពន្ធនាគារ ខណៈដែលកំពុងរង់ចាំការកាត់ទោសនៅប្រទេសម៉ិកស៊ិក ពីបទជាប់ពាក់ព័ន្ធជាមួយក្រុមជួញដូរ បន្ទាប់ពីត្រូវបាននិរទេសចេញពីសហរដ្ឋអាមេរិក។

ជាមួយគ្នានេះ ក្លឹបប្រដាល់ Coliseo ក៏បានចេញវីឌេអូចែករំលែកនៅលើប្រព័ន្ធផ្សព្វផ្សាយសង្គម ដោយកីឡាករ Gallo Estrada ដែលជាកន្លែងហាត់ប្រាណប្រដាល់ក្នុងរដ្ឋ Sonoran នៃរដ្ឋ Hermosillo បានថ្លែងអំណរគុណដល់ Julio Cesar ដែលបានមកហ្វឹកហាត់នៅទីនោះ ។

សូមជម្រាបផងថា Julio Cesar មានវ័យ ៣៩ឆ្នាំជាកូនប្រុសរបស់អតីតអ្នកប្រដាល់ជើងឯកពិភពលោក Julio Cesar Chavez Gonzalez ត្រូវបានដោះលែងពីពន្ធនាគារក្នុងរដ្ឋ Sonora ភាគខាងជើងម៉ិកស៊ិក កាលពីចុងសប្តាហ៍មុន បន្ទាប់ពីចៅក្រមក្នុងតំបន់បានសំរេចថារូបគេអាចបន្តដំណើរការផ្លូវច្បាប់នៅខាងក្រៅការឃុំខ្លួនបាន ក្រោយពេលជាប់ពន្ធនាគាររយៈពេល ៥ថ្ងៃនៅ Hermosillo ។

រដ្ឋអាជ្ញាម៉ិកស៊ិក ក៏បានចោទប្រកាន់ Chavez Jr. បានជាប់ពាក់ពាន់ជាមួយក្រុមជួញដូរគ្រឿងញៀន Sinaloa Cartel ដ៏មានឥទ្ធិពល ដែលទីក្រុងវ៉ាស៊ីនតោន ចាត់ទុកជាក្រុមភេរវករបរទេសកាលពីដើមឆ្នាំនេះ។ ហើយមេធាវី និងក្រុមគ្រួសាររបស់លោកបានបដិសេធតវ៉ារាល់ការចោទប្រកាន់នេះ ។ រូបគេក៏ធ្លាប់ជាម្ចាស់ខ្សែក្រវ៉ាត់ WBC middleweight ទម្ងន់មធ្យមកាលឆ្នាំ២០១១ និង២០១២ ៕

សូមជម្រាបផងថា ទាក់ទងនឹងករណីខាងលើ Chavez Jr. ត្រូវបានចាប់ខ្លួនដោយប៉ូលិសអន្តោប្រវេសន៍ កាលពីថ្ងៃទី០៣ ខែកក្កដា ត្រឹមតែប៉ុន្មានម៉ោងបន្ទាប់ពីការប្រកួតចាញ់កីឡាករ Jake Paul ហើយរូបគេត្រូវបានឃុំខ្លួននៅក្នុងមណ្ឌលឃុំឃាំងរដ្ឋតិចសាស់ ១ខែកន្លះ មុនពេលត្រូវបាននិរទេសទៅប្រទេសម៉ិកស៊ិក កាលពីថ្ងៃទី១៨ ខែសីហា ៕