(បរទេស)៖ ក្រុមហ៊ុនបច្ចេកវិទ្យាយក្ស Meta ដែលជាមេធំរបស់ Facebook និង Instagram បានប្រកាសពីការបង្កើតគណៈកម្មាធិការសកម្មភាពនយោបាយមួយ (PAC) នៅរដ្ឋកាលីហ្វ័រញ៉ា ដើម្បីគាំទ្រដល់បេក្ខជននយោបាយដែលពេញចិត្តចំពោះការអភិវឌ្ឍបញ្ញាសិប្បនិម្មិត (AI) និងមិនមានការរឹតត្បិតខ្លាំងពេកលើវិស័យនេះ។ នេះបើយោងតាមរបាយការណ៍របស់ទីភ្នាក់ងារសារព័ត៌មាន Reuters ចេញផ្សាយនៅថ្ងៃទី ២៧ ខែសីហា ឆ្នាំ ២០២៥។

ក្រុមនេះមានឈ្មោះថា «Mobilizing Economic Transformation Across (Meta) California» (ឬហៅកាត់ថា PAC)។ ក្រុមហ៊ុន Meta គ្រោងនឹងចំណាយថវិការាប់សិបលានដុល្លារតាមរយៈក្រុម PAC នេះ ដើម្បីបង្កើនឥទ្ធិពលរបស់ខ្លួនមុនការបោះឆ្នោតជ្រើសរើសអភិបាលរដ្ឋនៅឆ្នាំ ២០២៦។ ជំហាននេះធ្វើឡើងចំពេលដែលក្រុមហ៊ុន Meta កំពុងវិនិយោគប្រាក់យ៉ាងច្រើនលើវិស័យ AI ដើម្បីប្រកួតប្រជែងជាមួយក្រុមហ៊ុនបច្ចេកវិទ្យាដទៃទៀតនៅ Silicon Valley។

លោក Brian Rice អនុប្រធានគោលនយោបាយសាធារណៈរបស់ Meta បានលើកឡើងថា បទប្បញ្ញត្តិតឹងរ៉ឹងនៅរដ្ឋកាលីហ្វ័រញ៉ា អាចរារាំងការច្នៃប្រឌិត និងការរីកចម្រើនរបស់ AI ព្រមទាំងធ្វើឱ្យរដ្ឋនេះបាត់បង់តំណែងជាមេដឹកនាំបច្ចេកវិទ្យា។ ការបង្កើត PAC នេះបង្ហាញពីការប្តេជ្ញាចិត្តរបស់ Meta ក្នុងការចូលរួមចំណែកក្នុងដំណើរការនយោបាយ ដើម្បីការពារផលប្រយោជន៍អាជីវកម្មរបស់ខ្លួន។

គួរឱ្យកត់សម្គាល់ ក្រុមហ៊ុនបច្ចេកវិទ្យាធំៗផ្សេងទៀតដូចជា Uber និង Airbnb ក៏ធ្លាប់បានប្រើប្រាស់យុទ្ធសាស្ត្រស្រដៀងគ្នានេះដែរ ដើម្បីបង្កើនឥទ្ធិពលរបស់ពួកគេនៅរដ្ឋកាលីហ្វ័រញ៉ា។ លើសពីនេះ ក្រុមហ៊ុនមូលធនបណ្តាក់ទុន Andreessen Horowitz និងប្រធានក្រុមហ៊ុន OpenAI លោក Greg Brockman ក៏កំពុងបង្កើតក្រុមនយោបាយថ្មីមួយទៀតដែលផ្តោតលើ AI ផងដែរ៕