(ភ្នំពេញ)៖ ក្រុមកីឡាម៉ូតូទឹកឆ្នើមៗ នៃក្រុមជម្រើសជាតិកម្ពុជា គ្រោងនឹងត្រឡប់មកប្រមូលផ្ដុំហ្វឹកហាត់ក្នុងស្រុកវិញ នៅទីលានរបស់វីរៈកីឡាករ សាលី អ៊ូមើត ស្ថិតនៅទឹកដីស្រុកស្នូល ខេត្តក្រចេះ បន្ទាប់ពីទីលានស្ដង់ដារនេះ សាងសង់ជិតរួចរាល់ជាស្ថាពរ ដើម្បីសម្រួលដល់ការហ្វឹកហាត់ និងចៀសវាងនូវផលលំបាកផ្សេងៗ។ នេះបើតាមការបញ្ជាក់របស់លោក មាស ម៉ាប់ អគ្គលេខាធិការហសហព័ន្ធកីឡាម៉ូតូទឹកកម្ពុជា។

ក្រោយចុះពិនិត្យទីលាន OMS ដែលជាទីលានម៉ូតូទឹកសាងសង់ និងចំណាយធនធានផ្ទាល់ ដោយកីឡាករម្ចាស់មេដាយមាសកីឡាអាស៊ី និងស៊ីហ្គេម សាលី អ៊ូមើត អគ្គលេខាធិការសហព័ន្ធ បានបញ្ជាក់ថា ទីលាននេះ សាងសង់រួចរាល់ ៩០% ហើយ ។ ដូច្នេះចំពោះមុខ សហព័ន្ធនឹងរៀបចំធ្វើការស្នើសុំគោលការណ៍ ដើម្បីផ្ទេរកីឡាករម៉ូតូទឹកកម្ពុជា ដែលកំពុងហ្វឹកហាត់នៅក្រៅប្រទេស(ថៃ) ត្រឡប់មកហ្វឹកហាត់ក្នុងស្រុកវិញ។

លោក មាស ម៉ាប់ បន្ដថា «សព្វថ្ងៃនេះ កីឡាកររបស់យើង ជួបបញ្ហាលំបាក ដោយសារនៅឆ្ងាយ ពិបាកទាំងការទំនាក់ទំនង ការស្នាក់នៅ គឺពិបាកគ្រប់សព្វបែបយ៉ាង ។ ចឹងស្របពេលទីលានរបស់យើងរួចរាល់ ៩០% ។ អ៊ីចឹងយើងនឹងស្នើសុំផ្ទេរពីក្រៅប្រទេស មកហាត់នៅទីនេះ ដើម្បីឲ្យកីឡាកររបស់យើងងាយស្រួលក្នុងការហ្វឹកហាត់ ព្រោះនៅទីនេះដែរ គឺមានទីលានហ្វឹកហាត់ កន្លែងស្នាក់នៅ និងទីធ្លារផ្សេងទៀត សម្រាប់ឲ្យកីឡាករធ្វើលំហាត់ផ្សេងៗ»។

ទន្ទឹមនឹងការត្រៀមស្នើសុំផ្ទេរកីឡាករពីប្រទេសថៃ ដើម្បីមកហ្វឹកហាត់នៅក្នុងស្រុកវិញនេះដែរ លោកក៏ស្នើសុំឲ្យក្រសួង-ស្ថាប័នពាក់ព័ន្ធ ជួយសម្រួលទាក់ទងនឹងការនាំចូលសម្ភារផ្សេងៗ ពាក់ព័ន្ធដូចជាម៉ូតូទឹករបស់កីឡាករ និងសម្ភារពាក់ព័ន្ធជាដើម ។ ក្នុងនាមសហព័ន្ធលោកសង្ឃឹមថា ការផ្ទេរនេះ នឹងទទួលបានការគាំទ្រ និងកិច្ចសហការពីគ្រប់ភាគីពាក់ព័ន្ធ ដើម្បីជំរុញដល់ការហ្វឹកហាត់ និងត្រៀមការប្រកួតអន្ដរជាតិនានា របស់ក្រុមម៉ូតូទឹកកកម្ពុជា។

គួរដឹងថា បច្ចុប្បន្នសហព័ន្ធ មានកីឡាករ ៧រូប និងគ្រូបង្វឹក ២រូប ដែលកំពុងប្រមូលផ្ដុំហ្វឹកហាត់នៅក្រៅប្រទេស ក្រោមការដឹកនាំ និងមើលការខុសត្រូវរបស់វីរៈកីឡាករ សាលី អ៊ូមើត ក្នុងការជំរុញការបណ្ដុះបណ្ដាល អភិវឌ្ឍន៍ និងសម្របសម្រួលរាល់ការចូលរួមការប្រកួតអន្ដរជាតិនានា។ ក្រៅពីផែនការផ្ទេរកីឡាករមកហ្វឹកហាត់នៅទីលានស្ដង់ដារ ស្ថិតនៅខេត្ដក្រចេះ សហព័ន្ធក៏មានផែនការរៀបចំការប្រកួត និងសកម្មភាពជាច្រើននៅទីនោះផងដែរ៕