(មេនឆេស្ទើ)៖ បិសាចក្រហម Manchester United នៅសល់ពាន FA Cup និង Premier League ដើម្បីប្រជែងសម្រាប់រដូវកាលឆ្នាំ២០២៥-២៦ ក្រោយជ្រុះចេញពីកម្មវិធី League Cup នាយប់មិញ ក្រោមថ្វីជើងរបស់ Grimsby Town។ នេះបើយោងតាមការចេញផ្សាយដោយ BBC។

ក្រុមរបស់លោក Ruben Amorim បានលេងចាញ់ក្រុមម្ចាស់ផ្ទះ Grimsby Town មកពី League Two របស់អង់គ្លេស ដោយបាល់ ១១ម៉ែត្រកាត់សេចក្តី ពោលគឺ ១២-១១ នៅពេលប្រកួតពេញម៉ោង ៩០នាទីស្មើគ្នា ២-២ ពីក្នុងជុំទី២ នៃពានរង្វាន់លំដាប់ទី៣ អង់គ្លេស EFL Cup ដ្បិតសារិកាព្រៃ Newcastle United ជាម្ចាស់ជើងឯករដូវកាលមុន។

ក្នុងជំនួបដ៏តានតឹងនោះដែរ ខ្សែប្រយុទ្ធចំណូលថ្មី Bryan Mbeumo ដែលចូលលេងក្នុងនាមកីឡាករបម្រុងផងនោះ ជាអ្នករកបានគ្រាប់ទី១ បន្ទាប់ពីម្ចាស់ផ្ទះ Grimsby នាំមុខ ២គ្រាប់មុន និងខ្សែការពារកណ្តាល Harry Maguire រកបានគ្រាប់តាមស្មើ ២-២ ក្នុងរយៈពេលសល់ ១៥នាទីដល់ម៉ោងបិទបញ្ចប់ ដើម្បីទាត់ប៉េណាល់ទីកាត់សេចក្តីតែម្តង។

ទោះជាយ៉ាងណា ការទាត់បាល់ ១១ម៉ែត្រនោះដែរ វាបានអូសបន្លាយដល់ ២៣គ្រាប់ឯណោះ ទម្រាំរកឃើញក្រុមឈ្នះ-ចាញ់ នៅពេលសមាជិកថ្មីរបស់ Man Utd ដូចគ្នាគឺ Cunha និង Mbeumo សុទ្ធតែបរាជ័យទាត់មិនចូលដូចគ្នា ញាំងឱ្យ Man Utd ហាលអាវដ៏លឿនបំផុតក្នុងរយៈពេល ៣០ឆ្នាំ ដែលពួកគេធ្លាប់ចាញ់ York City ៣-០ នៅកីឡដ្ឋាន Old Trafford៕