(បរទេស)៖ ក្រុមហ៊ុនបច្ចេកវិទ្យាយក្ស Amazon បានប្រកាសពីគម្រោងដ៏មហិច្ឆតារបស់ខ្លួនក្នុងការដាក់ពង្រាយសេវាអ៊ីនធឺណិតផ្កាយរណប Kuiper នៅប្រទេសវៀតណាម។ នេះបើយោងតាមសេចក្តីថ្លែងការណ៍របស់ក្រសួងវិទ្យាសាស្ត្រ និងបច្ចេកវិទ្យាវៀតណាម ដែលត្រូវបានដកស្រង់ដោយទីភ្នាក់ងារព័ត៌មាន Reuters នៅថ្ងៃទី ២៧ ខែសីហា ឆ្នាំ ២០២៥។

ក្រុមហ៊ុន Amazon បានសម្រេចបោះទុនវិនិយោគរហូតដល់ ៥៧០ លានដុល្លារ ត្រឹមឆ្នាំ ២០៣០ ដើម្បីកសាងហេដ្ឋារចនាសម្ព័ន្ធបណ្តាញអ៊ីនធឺណិតដ៏ធំមួយ។ គម្រោងនេះរួមមានការសាងសង់ស្ថានីយដីចំនួន ៦ កន្លែង និងរោងចក្រផលិតឧបករណ៍ទទួលសេវា (terminal manufacturing) នៅភាគខាងជើងនៃប្រទេសវៀតណាម។ ដើម្បីសម្រេចផែនការនេះ ក្រុមហ៊ុនបានបង្កើតក្រុមហ៊ុនក្នុងស្រុកមួយឈ្មោះ Amazon Kuiper Vietnam Co., Ltd. នៅទីក្រុងហូជីមិញ ហើយបានដាក់ពាក្យស្នើសុំការអនុញ្ញាតដំណើរការសេវាអ៊ីនធឺណិតផ្កាយរណបគន្លងទាប (low Earth orbit) រយៈពេល ៥ ឆ្នាំផងដែរ។

គោលដៅចម្បងនៃគម្រោង Kuiper គឺដើម្បីផ្តល់សេវាអ៊ីនធឺណិតល្បឿនលឿន (broadband) ដល់តំបន់ដាច់ស្រយាល ក៏ដូចជានៅលើកោះនានាដែលមិនទាន់មានសេវាគ្រប់គ្រាន់។

គួរឱ្យដឹងផងដែរថា គូប្រជែងដ៏ធំរបស់ Amazon គឺក្រុមហ៊ុន Starlink ក៏ត្រូវបានរដ្ឋាភិបាលវៀតណាមអនុញ្ញាតឱ្យដំណើរការគម្រោងស្រដៀងគ្នានេះក្នុងរយៈពេលដូចគ្នា។ ការបោះជំហានដ៏ធំនេះរបស់ Amazon ធ្វើឡើងបន្ទាប់ពីខ្លួនបានបាញ់បង្ហោះផ្កាយរណបចំនួន ២៧ ដំបូងសម្រាប់គម្រោង Kuiper កាលពីខែមេសាកន្លងទៅ។ ការវិនិយោគនេះបានបង្ហាញពីការចាប់អារម្មណ៍យ៉ាងខ្លាំងរបស់ក្រុមហ៊ុនបច្ចេកវិទ្យាលំដាប់ពិភពលោកក្នុងការពង្រីកសេវាអ៊ីនធឺណិតផ្កាយរណបនៅទូទាំងតំបន់អាស៊ីអាគ្នេយ៍៕