(ម៉ូនិច)៖ ខ្សែប្រយុទ្ធពាក់លេខ៩ Harry Kane បានខកខានទាត់បាល់ ១១ម៉ែត្រអត់ចូលលើកដំបូង គិតចាប់តាំងឆ្នាំ២០២២ ក៏ប៉ុន្តែបានរួមចំណែកជួយ Bayern Munich ឡើងទៅជុំទី២ ផងដែរនៃពាន DFB Pokal 2025-26។ នេះបើយោងតាមការចេញផ្សាយដោយ BBC។

ប្រធានក្រុមតោកំណាចអង់គ្លេស វ័យ ៣១ឆ្នាំរូបនេះ បានបរាជ័យក្នុងការទាត់បាល់ប៉េណាល់ទីនៅនាទី៧៦ ដែលត្រូវបានសង្រ្គោះដោយអ្នកចាំទី Florian Stritzel និងបានរារាំងបាល់ស៊ុត និងតែតរបស់ Kane បន្តបន្ទាប់ផងដែរ ក្នុងប្រកួតទល់នឹងម្ចាស់ផ្ទះ Wehen Wiesbaden នាយប់មិញក្នុងជុំទី១ នៃពានរង្វាន់លំដាប់ទី២ អាល្លឺម៉ង់។

ទោះជាយ៉ាងណា Kane បានទាត់ចូលទាំង ២២គ្រាប់ប៉េណាល់ទីសម្រាប់ក្រុមខ្លារខិន Bayern ពោលគឺប៉េណាល់ទីនៅនាទី១៦ និងរកបានគ្រាប់ទី២ ទៀតនៅនាទី៩០+៤ ដែលជាគ្រាប់ជ័យជម្នះតែម្តង នៅពេលម្ចាស់ផ្ទះវាយបកតាមបានស្មើ ២-២ ប្រើរយៈពេលត្រឹម ៦នាទីប៉ុណ្ណោះ។ Olise ក៏រកបាន ១គ្រាប់ផងដែរដើម្បីនាំមុខ ២គ្រាប់មុនឱ្យក្រុមរបស់លោក Vincent Kompany។

Bayern Munich ម្ចាស់ជើងឯក Bundesliga រដូវកាលមុន ត្រូវរង់ចាំចាប់ឆ្នោតស្វែងរកគូប្រកួតសម្រាប់ជុំទី២ German Cup 2025-26 នៅរាត្រីថ្ងៃអាទិត្យចុងសប្តាហ៍នេះ។ ពួកគេរកបានជ័យជម្នះ ២ប្រកួតជាប់គ្នានារដូវកាលថ្មីនេះ និងបានកំពុងឈរទីកំពូលតារាងក្នុងលីគទៀតផង៕