(បរទេស)៖​ តាមរបាយការណ៍ពី Reuters កាលពីថ្ងៃទី២៧ ខែសីហា ឆ្នាំ២០២៥ បានឲ្យដឹងថា​ ក្រុុមហ៊ុនមេរបស់​ TikTok គឺ​ ByteDance បានបើកកម្មវិធីទិញភាគហ៊ុនត្រឡប់វិញ (share buyback) សម្រាប់បុគ្គលិក ដោយកំណត់តម្លៃក្រុមហ៊ុនជាង ៣៣០ ពាន់លានដុល្លារ ដែលកើនឡើងប្រហែល ៥.៥% បើប្រៀបធៀបនឹងតម្លៃកន្លងមកប្រមាណ ៣១៥ ពាន់លានដុល្លារ។

ក្នុងត្រីមាសទី២ ឆ្នាំ២០២៥ ប្រាក់ចំណូលរបស់ ByteDance បានកើនឡើង ២៥% បើប្រៀបនឹងឆ្នាំមុន ទៅដល់ប្រមាណ ៤៨ ពាន់លានដុល្លារ ហើយធ្វើឲ្យវាក្លាយជាក្រុមហ៊ុនបណ្តាញសង្គមមានប្រាក់ចំណូលច្រើនជាងគេក្នុងពិភពលោក។ កាលពីត្រីមាសទី១ ក៏ទទួលបានលេីសប្រាក់ចំណូលរបស់ Meta ដោយរកបានជាង ៤៣ ពាន់លានដុល្លារ ខណៈដែល Meta មានប្រមាណ ៤២.៣ ពាន់លានដុល្លារ។

ទោះបីជាប្រាក់ចំណូលលេីស Meta ក៏ដោយ តម្លៃក្រុមហ៊ុន ByteDance នៅតែមានតិចជាង មួយភាគប្រាំនៃតម្លៃទីផ្សាររបស់ Meta ដែលបច្ចុប្បន្នមានប្រមាណ ១.៩ ទ្រីលានដុល្លារ។ មូលហេតុគឺដោយសារ ហានិភ័យនយោបាយ និងបទបញ្ជារដ្ឋបាល ជាពិសេសនៅសហរដ្ឋអាមេរិក។​ បច្ចុប្បន្ន ByteDance កំពុងប្រឈមនឹងសម្ពាធពីសភា​អាមេរិក ដើម្បីឲ្យក្រុមហ៊ុន លក់ចេញ TikTok ក្នុងសហរដ្ឋអាមេរិកដោយយោងតាមបញ្ហាសន្តិសុខជាតិ។ កាលកំណត់ដើមគឺថ្ងៃទី ១៩ ខែមករា ឆ្នាំ២០២៥ ហេីយត្រូវបានពន្យារពេលដោយប្រធានាធិបតី Donald Trump ដល់ថ្ងៃទី១៧ ខែកញ្ញា ឆ្នាំ២០២៥។

គួរជម្រាបថា​ ទោះមានហានិភ័យនយោបាយក៏ដោយ ការទិញភាគហ៊ុនត្រឡប់ដោយប្រើប្រាក់ខ្លួនឯងបង្ហាញថា ByteDance មានស្ថានភាពហិរញ្ញវត្ថុរឹងមាំ និងមានអត្រាកម្រៃចំណេញល្អ៕