(វូហាន)៖ កីឡាករស្នូកឃ័រឈរនៅលំដាប់លេខ១ ពិភពលកបច្ចុប្បន្ន Judd Trump បានជ្រុះចេញពីព្រឹត្តិការណ៍ Wuhan Open 2025 នៅប្រទេសចិនត្រឹមវគ្គ ១៦នាក់ចុងក្រោយ ខណៈ Moody វ័យ ១៨ឆ្នាំឡើងជុំបន្ទាប់។ នេះបើយោងតាមការចេញផ្សាយដោយ BBC។

Trump អតីតម្ចាស់ជើងឯកស្នូកឃ័រពិភពលោក ឆ្នាំ២០២៣ បានបរាជ័យក្រោមស្នាដៃរបស់កីឡាករអង់គ្លេសដូចគ្នា Gary Wilson ដោយលទ្ធផល ៥ទល់នឹង៤ នាយប់មិញ ស្របពេលយុវជនវ័យទើបតែ ១៨ឆ្នាំ Stan Moody បានឆ្លងចូលវគ្គ ៨នាក់ជាលើកដំបូងក្នុងអាជីពនៃកម្មវិធីលក្ខណៈ Tour មួយនេះ។

Trump បានខកចិត្ត ក្នុងការប្រកួតសិតទី៩ កាត់សេចក្តី បន្ទាប់ពីខិតខំវាយបកតាមស្មើ ៤-៤ ដ្បិតគូប្រជែង Wilson ជាអ្នករកបានជ័យជម្នះដោយលទ្ធផល ៨៥ពិន្ទុ ដើម្បីឡើងទៅប៉ះ John Higgins សម្រាប់វគ្គ ៨នាក់ជាបន្តទៀត នៅពេលជើងខ្លាំងស្កុតឡេនបានទម្លាក់ Tom Ford ដោយលទ្ធផល ៥-១។

ក្នុងថ្ងៃនោះដែរ កីឡាករវ័យក្មេង Moody មកពីតំបន់ Halifax ក៏បានយកឈ្នះកីឡាករអង់គ្លេស Barry Hawkins ៥-០ ដាច់តែម្តង ដើម្បីឡើងវគ្គ ៨នាក់ដូចការសន្យារបស់គេ និងធ្វើបានដល់ទៅ ១០៨ពិន្ទុ ដែលជាការធ្វើបានល្អបំផុតរបស់គេក្នុងអាជីពស្នូកឃ័រមួយនេះ។

Moody ត្រូវប៉ះម្ចាស់ការពារតំណែងជើងឯក Xiao Guodong របស់ម្ចាស់ផ្ទះចិន ដែលធ្វើបាន ១៣៦ពិន្ទុខ្ពស់បំផុត តាមរយៈទម្លាក់គូប្រជែង Matthew Selt ដោយលទ្ធផល ៥-២ ពីក្នុងវគ្គ ១៦នាក់មកដែរ៕