(ភ្នំពេញ)៖ ក្រុមបាល់ទាត់នារី នៃក្លិបភ្នំពេញក្រោន របស់កម្ពុជា នឹងត្រូវប្រកួតចុងក្រោយរបស់ខ្លួន ក្នុងពូលE នៅក្នុងវគ្គជម្រុះបឋម នៃពានរង្វាន់ជើងឯកក្លិបបាល់ទាត់នារីទ្វីបអាស៊ី (AFC Women’s Champions League) ឆ្នាំ២០២៥/២៦ ដោយត្រូវជួបក្រុម Kitchee FC មកពីហុងកុង នាវេលាម៉ោង ៧យប់ថ្ងៃទី២៨ ខែសីហា ឆ្នាំ២០២៥ នេះ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។

នេះគឺជាការប្រកួតទី២ របស់ក្រុមនារីភ្នំពេញក្រោន បន្ទាប់ពីប្រកួតដំបូង កាលពីដើមសប្ដាហ៍កន្លងទៅ បានចាញ់ក្រុមភ្ញៀវ East Bengal របស់ប្រទេសឥណ្ឌា ដោយលទ្ធផល ១-០។ ការណ៍នេះ ភ្នំពេញក្រោន គឺត្រូវការឈ្នះដាច់ខាត អមជាមួយការរកគ្រាប់បាល់ឲ្យបានច្រើនតាមដែលអាចធ្វើបាន ដើម្បីមានឱកាសអ៊ុតកៅអីវគ្គបន្ដ ខណៈបើស្មើ ឬចាញ់ ក្រុមតំណាងកម្ពុជានេះ នឹងត្រូវអស់ឱកាសត្រឹមយប់នេះជាផ្លូវការតែម្ដង។

ជុំវិញការប្រកួតបញ្ចប់ពូលនេះ អ្នកគ្រូ ម៉ៅ សាវីន គ្រូបង្វឹកក្រុមនារីភ្នំពេញក្រោន បានរក្សាជំហរយ៉ាងមុតមាំ ក្នុងការដឹកនាំក្រុមប្រកួតប្រជែង ទល់នឹងក្រុម Kitchee FC ដែលជាក្រុមបានសម្រាកពេញលេញ ដ្បិតនេះទើបជាការប្រកួតដំបូងរបស់ពួកគេ។ គ្រូបង្វឹកដដែលបន្ដថា ក្រុមទាំងមូល គ្មានការព្រួយបារម្ភ ឬបាត់បង់ទំនុកចិត្តឡើយ ពោលគឺក្នុងនាមម្ចាស់ផ្ទះ ហើយក៏ជាឱកាសលើកដំបូង នៃការចូលរួមប្រកួតពានកម្រិតទ្វីបនេះ ក្រុមប្ដេជ្ញានឹងធ្វើឲ្យបានល្អ ដើម្បីដណ្ដើមលទ្ធផលល្អជូនក្លិប និងអ្នកគាំទ្រកម្ពុជា។

គួរដឹងថា វគ្គជម្រុះបឋម នៃពានរង្វាន់ AFC Women’s Champions League 2025/26 ដែលកម្ពុជាធ្វើម្ចាស់ផ្ទះពូលE នេះ មានបេក្ខភាព ៣ក្រុមចូលរួម ខណៈបច្ចុប្បន្នក្រុម East Bengal កំពុងឈរកំពូលតារាង មាន ៣ពិន្ទុ គ្រាដេលភ្នំពេញ និង Kitchee នៅមិនទាន់មានពិន្ទុដូចគ្នា។ សម្រាប់ការប្រកួតបញ្ចប់ពូលចុងក្រោយ គឺជាជំនួបរវាងក្រុម East Bengal និង Kitchee នាថ្ងៃទី៣១ ខែសីហាខាងមុខ ហើយក្រុមដែលឈរកំពូលតារាង នឹងទទួលបានកៅអីវគ្គចែកពូលដោយស្វ័យប្រវត្តិ ខណៈក្រុមឈរលេខ២ ត្រូវចាំអ៊ុតជាមួយក្រុមលេខ២ ពូលផ្សេងៗ ដើម្បីចម្រាញ់ក្រុមលេខ២ ល្អជាងគេឡើងទៅបង្គ្រប់កៅអីវគ្គចែកពូលផងដែរ៕