(ភ្នំពេញ)៖ សហព័ន្ធកីឡាបាល់ទាត់ទ្វីបអាស៊ី(AFC) បានចាប់ឆ្នោតបែងចែកពូល សម្រាប់ធ្វើការប្រកួតពានរង្វាន់លំដាប់ទី៣ ទ្វីបអាស៊ី AFC Challenge League 2025/26 រួចរាល់ហើយ ខណៈក្រុមតំណាងកម្ពុជា ២ក្រុម ស្ថិតនៅពូលផ្សេងគ្នា ដើម្បីធ្វើការប្រកួតជម្រុះប្រចាំតំបន់អាស៊ីខាងកើត ក្នុងនោះក្លិបព្រះខ័នរាជស្វាយរៀង ស្ថិតក្នុងពូលD និងក្លិបភ្នំពេញក្រោន ស្ថិតក្នុងពូលE។

សម្រាប់ក្លិបព្រះខ័នរាជស្វាយរៀង ដែលត្រូវបាន AFC អនុញ្ញាតឲ្យធ្វើម្ចាស់ផ្ទះវគ្គចែកពូលប្រចាំតំបន់អាស៊ីខាងកើត ។ ដូច្នេះក្រុមជើងឯកលីគកំពូលកម្ពុជានេះ នឹងត្រូវបើកទ្វារពហុកីឡដ្ឋានជាតិមរតកតេជោ ទទួលក្រុមភ្ញៀវ ៣ក្រុម ដែលបានចាប់ឆ្នោតស្ថិតក្នុងពូលD នៅរសៀលថ្ងៃទី២៨ ខែសីហានេះ គឺមានក្រុម Manila Digger របស់ហ្វីលីពីន, ក្រុម SP Falcons របស់ម៉ុងហ្គោលី និងក្រុម Ezra FC របស់ប្រទេសឡាវ។

ចំណែកក្រុមភ្នំពេញក្រោន ដោយសារមិនអាចស្ថិតក្នុងពូលជាមួយក្រុមតំណាងកម្ពុជាដូចគ្នា ក្រុមសិង្ហក្រហមនេះ បានចាប់ឆ្នោតស្ថិតក្នុងពូលE ជាមួយក្រុម Shan United របស់មីយ៉ាន់ម៉ា, ក្រុម Tainan City FC មកពីឆាយនីសតៃប៉ិ និងក្រុម Dewa United របស់ឥណ្ឌូនេស៊ី ដែលទទួលបានការអនុញ្ញាតឲ្យធ្វើម្ចាស់ផ្ទះវគ្គចែកពូលប្រចាំតំបន់អាស៊ីខាងកើត ដូចក្លិបព្រះខ័នរាជស្វាយរៀងដែរ ដែលការប្រកួតនឹងចាប់ផ្ដើមពីថ្ងៃទី២៦ ខែតុលា ដល់ថ្ងៃទី១ ខែវិច្ឆិកា ឆ្នាំ២០២៥ ខាងមុខ៕