(ភ្នំពេញ)៖ ក្រុមបាល់ទាត់នារី នៃក្លិបភ្នំពេញក្រោន របស់កម្ពុជា បានអស់ឱកាសឡើងវគ្គបន្ដ នៃពានរង្វាន់ជើងឯកក្លិបបាល់ទាត់នារីទ្វីបអាស៊ី AFC Women’s Champions League ឆ្នាំ២០២៥/២៦ ហើយ ក្រោយភ្លាត់ស្មើចុងម៉ោង ទល់នឹងក្រុម Kitchee FC របស់ហុងកុង ដោយលទ្ធផល ៣-៣ នៅក្នុងការប្រកួតចុងក្រោយរបស់ខ្លួន កាលពីរាត្រីថ្ងៃទី២៨ ខែសីហាកន្លងទៅ នៅពហុកីឡដ្ឋានជាតិ(អូឡាំពិក)។

ការប្រកួតដ៏ស្វិតស្វាញនេះ ក្រុម Kitchee រកបាន ២គ្រាប់មុន ដោយកីឡាការិនី Cheung Wai Ki នៅនាទី២៧ និងមិត្ដរួមក្រុម Chu So Kwan នៅនាទី៣១ មុនកីឡាការិនី Airi Kuroki វាយបកបាន ១គ្រាប់វិញ ឲ្យភ្នំពេញក្រោន នៅនាទី៣៣ ។ ចូលវគ្គទី២ ក្រុមសិង្ហក្រហមនារីភ្នំពេញក្រោន បានព្យាយាមកាន់តែខ្លាំង រហូតរកបាន ២គ្រាប់បន្ថែម ដោយកីឡាការិនី វិបុល សិរីស៊ីថា នៅនាទី៨២ និង ពឿន គន្ធា នៅនាទី៨៥។

ប៉ុន្ដែគួរឲ្យសោកស្ដាយឱកាសទទួលបាន ៣ពិន្ទុ ដើម្បីអ៊ុតកៅអីវគ្គបន្ដ ត្រូវបានបញ្ចប់ត្រឹម ១នាទីចុងក្រោយ បន្ទាប់ពីកីឡាការិនី Kwong Wing Yan រកបានគ្រាប់តាមស្មើឲ្យក្រុម Kitchee វិញ នៅនាទី៩០+៣ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង ដែលនាំឲ្យក្រុមនារីភ្នំពេញក្រោន ប្ដូរពីភាពសប្បាយរីករាយក្រោយការវាយបកនាំមុខ មកត្រឹមស្មើនៅនាទីចុងក្រោយ ជាមួយភាពសោកសៅ ដ្បិតបាត់បង់ឱកាសឡើងទៅវគ្គចែកពូលជាផ្លូវការ។

ក្រុមនារីភ្នំពេញក្រោន បានបញ្ចប់ការប្រកួតក្នុងពូលE ក្នុងនាមម្ចាស់ផ្ទះ ដោយរកបាន ១ពិន្ទុ ក្រោយឆ្លងកាត់ ១ប្រកួតស្មើ ១ និងចាញ់ ១ ពោលគឺចាញ់ក្រុម East Bengal របស់ឥណ្ឌា ១-០ កាលពីដើមសប្ដាហ៍កន្លងទៅ។ រីឯក្រុម East Bengal និងក្រុម Kitchee នៅសល់ ១ប្រកួតក្នុងដៃ ដែលត្រូវជួបគ្នានាថ្ងៃទី៣១ ខែសីហាខាងមុខ ដើម្បីកាត់សេចក្ដីរកក្រុមកំពូលតារាងឡើងវគ្គបន្ដ នៃពានជើងឯកក្លិបបាល់ទាត់នារីទ្វីបអាស៊ី ឆ្នាំ២០២៥/២៦៕