(បរទេស)៖ ក្រុមឥន្រ្ទី Crystal Palace របស់អង់គ្លេស បានឆ្លងចូលវគ្គ League Phase ដែលនឹងត្រូវចាប់ឆ្នោតរាត្រីថ្ងៃសុក្រនេះ សម្រាប់ពានរង្វាន់លំដាប់ទី៣ អឺរ៉ុប UEFA Europa Conference League បើទោះបីជាបញ្ចប់ក្នុងលទ្ធផល ០-០ នៃជើងទី២ វគ្គជម្រុះទល់នឹង Fredrikstad យប់មិញក៏ដោយ។

ពីគេហទំព័រកីឡា BBC បានចេញផ្សាយថា អតីតម្ចាស់ជើងឯកពាន FA Cup រដូវកាលមុនមួយនេះ បានយកឈ្នះ Fedrikstad របស់ន័រវេស ១-០ កាលជើងទី១ មុនពេលបញ្ចប់ជើងទី២ ដោយគ្មានគ្រាប់បាល់នៅរាត្រីថ្ងៃព្រហស្បតិ៍ ទី២៨ ខែសីហា ឆ្នាំ២០២៥ ក្នុងប្រទេសន័រវេស។

កីឡាករ Jean-Philippe Mateta គឺជាអ្នករកបានតែ ១គ្រាប់ពីជើងទី១ ក្នុងកីឡដ្ឋាន Selhurst Park សម្រាប់ក្រុមសមាជិកលេងនៅ Premier League ដែលត្រូវបង្ខំចិត្តលេងវគ្គជម្រុះពាន ECL នេះ ក៏ព្រោះតែក្លិប Lyon មានកៅអីលេងពានលំដាប់ទី២ Europa League ដែលស្ថិតក្រោមម្ចាស់តែមួយ។

ទោះជាយ៉ាងណា Crystal Palace បានស្ថិតក្នុងចំណោម ២៤ក្រុមជ័យជម្នះពីវគ្គជម្រុះ ២៤ក្រុមផ្សេងទៀត និង ១២ក្រុមចាញ់វគ្គជម្រុះពី Europa League។ ប្រកួតបន្ទាប់ ពួកគេត្រូវប៉ះ Aston Villa ប្រចាំសប្តាហ៍ទី៣ ក្របខណ្ឌ Premier League រដូវកាល ២០២៥-២៦ ដែលទើបមាន ២ពិន្ទុ ក្រោយលេងស្មើទាំង ២លើករួចមក៕