(ឡុងដ៏)៖ ក្លឹបបិសាចក្រហម Manchester United បានយល់ព្រមលក់ខ្សែបម្រើស្លាបសញ្ជាតិអាហ្សង់ទីន Alejandro Garnacho ទៅឱ្យក្លឹបរួមលីគ Chelsea FC នៅក្នុងតម្លៃ ៤០លានផោន ឬស្មើនឹងប្រមាណ ៥៤លានដុល្លារ។

តាមរយៈតម្លៃផ្ទេរនេះ បានធ្វើឱ្យបុរសវ័យ ២១ឆ្នាំ Garnacho ក្លាយកីឡាករមានតម្លៃផ្ទេរខ្ពស់បំផុតទី៤ដែលចាក់ចេញពីក្លឹប Man United បន្ទាប់ពីរាមច្បងកំពូលស៊ុត Cristiano Ronaldo, Romelu Lukaku និង Angel di Maria ។

ស្ថិតក្រោមការដឹកនាំដោយអ្នកចាត់ការ Ruben Amorim កីឡាករ Garnacho មិនមានជម្រើសណាមួយសម្រាប់ក្រុមរបស់គ្រូបង្វឹកសញ្ជាតិព័រទុយហ្គាល់នៅរដូវកាលនេះ ដ្បិត Man United ក៏មិនទាន់លេងឈ្នះនោះទេនៅ ២ប្រកួតដំបូងក្នុងលីគ Premier League របស់ពួកគេ នឹងបានធ្លាក់ចេញពី League Cup ដោយការស៊ុតបាល់ប៉េណាល់ទីចាញ់ក្រុម Grimsby Town ។

មុនការចាក់ចេញនេះ Garnacho លេងបាន ៩៣ប្រកួតក្នុងលីគ Premier League សម្រាប់ Man United ខណៈរូបគេក៏ស្ថិតក្នុងចំណោមកីឡាករ ៥នាក់ដែលកំពុងស្វែងរកការចាកចេញពីក្លឹបបិសាចក្រហមក្នុងទីផ្សារដោះដូររដូវក្តៅនេះ ។ ខណៈកីឡាករចេញពីឈុតយុវជនរូបនេះក៏រកបាន ១៦គ្រាប់ផងដែរ ក្នុងរយៈពេលលេង ៤រដូវកាលកន្លងមកនេះ ៕