(បរទេស)៖ ក្រុមហ៊ុនបច្ចេកវិទ្យាយក្ស Microsoft បានសម្រេចបណ្តេញបុគ្គលិកចំនួន ៤ នាក់ចេញពីការងារ បន្ទាប់ពីពួកគេបានចូលរួមក្នុងការធ្វើបាតុកម្មប្រឆាំងនឹងទំនាក់ទំនងក្រុមហ៊ុនជាមួយប្រទេស អ៊ីស្រាអែល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៩​ ខែសីហា ឆ្នាំ២០២៥។

ក្នុងចំណោមបុគ្គលិកទាំង ៤ នាក់នេះ គឺអ្នកស្រី Anna Hattle និងអ្នកស្រី Riki Fameli បានធ្វើបាតុកម្មអង្គុយបិទផ្លូវនៅការិយាល័យប្រធានក្រុមហ៊ុន។ ចំណែកឯអ្នកស្រី Nisreen Jaradat និងលោក Julius Shan ក៏ត្រូវបានបណ្តេញចេញផងដែរ បន្ទាប់ពីបានចូលរួមបាតុកម្មនៅទីតាំងកណ្តាលរបស់ក្រុមហ៊ុន។ ក្រុមអ្នកតវ៉ាដែលមានឈ្មោះថា «No Azure for Apartheid» បានបញ្ជាក់ថា ការបណ្តេញចេញនេះបានធ្វើឡើងតាមរយៈសារសំឡេងដែលក្រុមហ៊ុនបានផ្ញើជូនពួកគេ។

Microsoft បានឆ្លើយតបថា ការបញ្ចប់កិច្ចសន្យាការងារនេះ គឺដោយសារតែបុគ្គលិកទាំងនោះបានរំលោភលើគោលការណ៍ដ៏ធ្ងន់ធ្ងររបស់ក្រុមហ៊ុន និងបានបង្កជាបញ្ហាសុវត្ថិភាពយ៉ាងធ្ងន់ធ្ងរ។

ក្រុមអ្នកតវ៉ាបានទាមទារឲ្យ Microsoft កាត់ផ្តាច់រាល់ទំនាក់ទំនងជាមួយអ៊ីស្រាអែល និងទូទាត់សំណងដល់ប្រជាជន ប៉ាឡេស្ទីន។ ពួកគេអះអាងថា Microsoft បានផ្តល់ឧបករណ៍បច្ចេកវិទ្យាដែលជួយដល់អ៊ីស្រាអែលក្នុងការប្រព្រឹត្តអំពើប្រល័យពូជសាសន៍។ កន្លងមកមានរបាយការណ៍រួមគ្នាបានបង្ហាញថា យោធាអ៊ីស្រាអែលបានប្រើប្រាស់កម្មវិធី Azure របស់ Microsoft ដើម្បីផ្ទុកទិន្នន័យសម្ងាត់ពីប្រជាជនប៉ាឡេស្ទីន។

គួរជម្រាបថា ការតវ៉ាទាំងនេះបានកើតឡើងស្របពេលដែលវិបត្តិមនុស្សធម៌នៅតំបន់ Gaza កាន់តែធ្ងន់ធ្ងរឡើង ចំណែកឯក្រុមហ៊ុន និងស្ថាប័នជាច្រើនទៀតក៏បានប្រឈមមុខនឹងការតវ៉ាស្រដៀងគ្នានេះដែរ។ ជម្លោះរវាងអ៊ីស្រាអែល និងប៉ាឡេស្ទីនបានផ្ទុះឡើងខ្លាំងតាំងពីខែតុលា ឆ្នាំ ២០២៣ ដែលបង្កឲ្យមានការខូចខាតយ៉ាងធ្ងន់ធ្ងរ និងបណ្តាលឲ្យមានមនុស្សស្លាប់រាប់ម៉ឺននាក់៕