(បរទេស)៖ ក្រុមហ៊ុនផលិតរថយន្តយក្សរបស់អាល្លឺម៉ង់ Volkswagen បានបន្តកិច្ចសហការរយៈពេល ៥ ឆ្នាំបន្ថែមទៀតជាមួយក្រុមហ៊ុន Amazon Web Services (AWS) ដែលជាផ្នែកមួយរបស់ Amazon។ គោលបំណងសំខាន់នៃភាពជាដៃគូនេះ គឺដើម្បីប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីធ្វើឱ្យដំណើរការផលិតកម្មរបស់ក្រុមហ៊ុនកាន់តែប្រសើរឡើង និងកាត់បន្ថយការចំណាយ។ នេះបើយោងតាមការចេញផ្សាយដោយ CNA នៅថ្ងៃទី២៩ ខែសីហា ឆ្នាំ២០២៥។

បច្ចុប្បន្ន Volkswagen កំពុងប្រើប្រាស់ប្រព័ន្ធឌីជីថលមួយឈ្មោះថា​ «Digital Production Platform» (DPP) ដែលភ្ជាប់រោងចក្ររបស់ខ្លួនជាមួយប្រព័ន្ធ Cloud របស់ Amazon។ ប្រព័ន្ធនេះកំពុងដំណើរការនៅតាមរោងចក្រចំនួន ៤៣ កន្លែងនៅទូទាំងទ្វីបអឺរ៉ុប និងអាមេរិក។ ការប្រើប្រាស់ប្រព័ន្ធទំនើបនេះ នឹងជួយឱ្យរោងចក្រអាចដំណើរការបានរលូន និងមានប្រសិទ្ធភាពខ្ពស់ ពិសេសក្នុងការគ្រប់គ្រងដំណើរការដំឡើងរថយន្ត។

លោក Hauke Stars នាយកប្រតិបត្តិផ្នែកព័ត៌មានវិទ្យារបស់ក្រុមហ៊ុន Volkswagen បានថ្លែងថា ក្រុមហ៊ុនមានមហិច្ឆតាចង់ក្លាយជាអ្នកដឹកនាំបច្ចេកវិទ្យាក្នុងឧស្សាហកម្មរថយន្ត។ ដូច្នេះហើយ ទើបការវិនិយោគលើការធ្វើទំនើបកម្ម និងការតភ្ជាប់បណ្តាញទិន្នន័យនៅគ្រប់ផ្នែក គឺជាចំណុចសំខាន់។

គួរជម្រាបថា ក្រុមហ៊ុន Volkswagen រំពឹងថាការប្រើប្រាស់ប្រព័ន្ធនេះនឹងជួយសន្សំសំចៃប្រាក់បានរាប់សិបលានអឺរ៉ូក្នុងរយៈពេលមធ្យម ដែលជាផ្នែកមួយនៃយុទ្ធសាស្ត្រកាត់បន្ថយការចំណាយរបស់ខ្លួន៕