(បរទេស)៖ ក្រុមហ៊ុនផលិតរថយន្តអគ្គិសនីដ៏ធំបំផុតរបស់ចិន BYD បានកាត់បន្ថយគោលដៅលក់របស់ខ្លួនសម្រាប់ឆ្នាំ២០២៥ ចុះប្រហែល ១៦%។ នេះបើយោងតាមប្រភពជិតស្និទ្ធជាមួយក្រុមហ៊ុន។ ការសម្រេចចិត្តនេះបានបង្ហាញពីការធ្លាក់ចុះ បន្ទាប់ពីកន្លងទៅមានការរីកចម្រើនយ៉ាងឆាប់រហ័ស។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី០៤ ខែកញ្ញា ឆ្នាំ២០២៥។

BYD បានកាត់បន្ថយគោលដៅលក់រថយន្តប្រចាំឆ្នាំ២០២៥ ចុះមកប្រហែល ៤.៦លានគ្រឿង បើប្រៀបធៀបនឹងគោលដៅដើមដែលមានជាង ៥.៥ លានគ្រឿង។ នេះគឺជាអត្រាកំណើនអប្បបរមាសម្រាប់ក្រុមហ៊ុននេះចាប់តាំងពីឆ្នាំ២០២០មក។ BYD ត្រូវបានគេដឹងថាប្រឈមមុខនឹងការធ្លាក់ចុះប្រាក់ចំណេញ ៣០% ក្នុងត្រីមាសថ្មីៗនេះ ដែលជាការធ្លាក់ចុះដំបូងបំផុតក្នុងរយៈពេលជាច្រើនឆ្នាំ។ ជាពិសេស ការផលិតរថយន្តក្នុងខែកក្កដា និងសីហា បានធ្លាក់ចុះជាបន្តបន្ទាប់ ដោយក្នុងខែសីហា ផលិតកម្មបានធ្លាក់ចុះ ជាង ៣.៧៨%ប្រៀបធៀបនឹងឆ្នាំមុន និងការលក់ក្នុងស្រុកក៏បានធ្លាក់ចុះ ១៤.៣% ផងដែរ។ ដើម្បីប្រជែងក្នុងទីផ្សារដែលមានការប្រកួតប្រជែងខ្លាំង និងអតិថិជនមិនចង់ចំណាយប្រាក់ច្រើន BYD បានបញ្ចុះតម្លៃរថយន្តរបស់ខ្លួនលើ ២២ ម៉ូដែល ជាមួយការបញ្ចុះតម្លៃខ្លះដល់ទៅ ៣៤%។ ទោះបីជាការបញ្ចុះតម្លៃនេះជួយលើការលក់ក៏ដោយ ប៉ុន្តែនៅតែប៉ះពាល់ដល់កំរិតចំណេញសរុបរបស់ក្រុមហ៊ុន។

បញ្ហាស្តុករថយន្តនៅតាមភ្នាក់ងារលក់ (dealer) ក៏កើតមានផងដែរ ដោយមានសល់ស្តុកក្នុងរយៈពេលលើសពី៣ខែ ប្រៀបធៀបនឹងថ្នាក់ឧស្សាហកម្មជាមធ្យម។ ជាចុងក្រោយនេះ BYD ក៏បានផ្អាកការពង្រីករោងចក្រ និងបញ្ឈប់ការផលិតពេលយប់ផងដែរ។ ទោះបីជាមានបញ្ហាក្នុងស្រុក BYD ក៏កំពុងពង្រីកទីផ្សារខាងក្រៅប្រទេស។ ក្រុមហ៊ុនបានបើកដំណើរការយាន្តយន្តដឹកទំនិញផ្ទាល់ខ្លួន និងមានគម្រោងបើករោងចក្រថ្មីៗនៅបរទេស។ គោលបំណងរបស់ BYD គឺដើម្បីឱ្យ ៥០% នៃការលក់រថយន្តក្នុងអនាគតកើតមាននៅបរទេស។

សរុបមក ការកាត់បន្ថយគោលដៅលក់របស់ BYD បានបញ្ជាក់ថា តុល្យភាពទីផ្សាររថយន្តអគ្គិសនីនៅចិនកំពុងមានការប្រែប្រួលខ្លាំង។ ក្រុមហ៊ុនបានចុះសម្រួលការផលិត និងផ្លាស់ប្តូរយុទ្ធសាស្ត្រដើម្បីប្រយុទ្ធនឹងភាពប្រែប្រួលនៃតម្លៃ និងការប្រកួតប្រជែងខ្ពស់លើទីផ្សាយរថយន្តអគ្គិសនី៕