(បរទេស)៖ រដ្ឋាភិបាលឥណ្ឌាបានអះអាងថា ក្រុមហ៊ុន Foxconn ដែលជាក្រុមហ៊ុនផលិត iPhone ដ៏ធំ នឹងមិនជួបប្រទះផលប៉ះពាល់ធំដុំចំពោះប្រតិបត្តិការរបស់ខ្លួនឡើយ ទោះបីជាបុគ្គលិកជនជាតិចិនមួយចំនួនត្រូវបានបញ្ជាឲ្យត្រឡប់ទៅប្រទេសរបស់ពួកគេវិញក៏ដោយ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១២ ខែកញ្ញា ឆ្នាំ២០២៥។

លោក S. Krishnan លេខាធិការនៃក្រសួងបច្ចេកវិទ្យាព័ត៌មានឥណ្ឌា បានថ្លែងប្រាប់អ្នកកាសែតនៅទីក្រុងតៃប៉ិថា៖ «ទោះបីជាកម្មករជនជាតិចិនមួយចំនួនត្រូវចាកចេញក៏ដោយ ក៏ប្រតិបត្តិការមិនបានរងផលប៉ះពាល់ធ្ងន់ធ្ងរខ្លាំងនោះដែរ»។ លោកបានបន្ថែមទៀតថា ក្រុមហ៊ុន Foxconn អាចគ្រប់គ្រងស្ថានភាពនេះបានយ៉ាងល្អ ដោយសារពួកគេមានក្រុមការងារដែលមានស្រាប់នៅក្នុងប្រទេសឥណ្ឌា រួមជាមួយបុគ្គលិកមកពីកោះតៃវ៉ាន់ និងសហរដ្ឋអាមេរិក។

ការសម្រេចចិត្តរបស់ Foxconn ក្នុងការផ្លាស់ប្តូរបុគ្គលិកនេះ គឺកើតឡើងស្របពេលដែលក្រុមហ៊ុន Apple និង Foxconn កំពុងបង្កើនការផលិត iPhone នៅប្រទេសឥណ្ឌា ដើម្បីកាត់បន្ថយការពឹងផ្អែកលើប្រទេសចិន។

គួរជម្រាបថា ទំនាក់ទំនងរវាងឥណ្ឌា និងចិនមានភាពតានតឹងចាប់តាំងពីការប៉ះទង្គិចគ្នាផ្នែកយោធានៅតាមព្រំដែនក្នុងឆ្នាំ២០២០។ ទោះជាយ៉ាងណាក៏ដោយ លោក Krishnan បានបញ្ជាក់ថា៖ «ការយល់ដឹងរបស់យើងគឺថា Foxconn មានការប្តេជ្ញាចិត្តក្នុងការមើលឃើញរាល់ការវិនិយោគទាំងអស់នៅក្នុងប្រទេសឥណ្ឌា ... ការពង្រីករបស់ពួកគេនៅក្នុងប្រទេសឥណ្ឌាមានសារៈសំខាន់ខ្លាំងណាស់»៕