(បរទេស)៖ កម្មវិធីបច្ចេកវិទ្យាដែលជាកម្មសិទ្ធិរបស់ធនាគារធំៗបំផុតរបស់អូស្ត្រាលី កំពុងត្រូវបានធ្វើតេស្តសាកល្បងជាមធ្យោបាយថ្មីមួយ ដើម្បីអនុវត្តការហាមឃាត់បណ្តាញសង្គមចំពោះយុវវ័យ ដែលនឹងចាប់ផ្តើមនៅខែធ្នូខាងមុខនេះ។ ឧបករណ៍នេះមានឈ្មោះថា ConnectID ដែលមានសមត្ថភាពផ្ទៀងផ្ទាត់អាយុរបស់អ្នកប្រើប្រាស់ ដោយផ្អែកលើព័ត៌មានគណនីធនាគាររបស់ពួកគេ។ នេះជាការចូលរួមដ៏សំខាន់មួយរបស់វិស័យហិរញ្ញវត្ថុ នៅក្នុងច្បាប់ថ្មីដែលពិភពលោកកំពុងតាមដានយ៉ាងយកចិត្តទុកដាក់។

យោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៧​​ ខែកញ្ញា ឆ្នាំ២០២៥ បានឱ្យដឹងថា ConnectID ត្រូវបានភ្ជាប់ជាមួយកម្មវិធីរបស់ក្រុមហ៊ុនសិង្ហបុរីឈ្មោះ k-ID ដែលប្រើប្រាស់បច្ចេកវិទ្យាស្មានអាយុដោយផ្អែកលើរូបភាពផ្ទៃមុខ។ ក្រុមហ៊ុន k-ID បានបញ្ជាក់ថា ភាពជាដៃគូនេះកំពុងត្រូវបានសាកល្បងរួចហើយ ដោយក្រុមហ៊ុនបណ្តាញសង្គមមួយចំនួននៅក្នុងប្រទេសអូស្ត្រាលី។ បច្ចេកវិទ្យានេះមានសារៈសំខាន់ ពីព្រោះរបាយការណ៍បានរកឃើញថា ប្រព័ន្ធស្មានអាយុដោយប្រើរូបថត Selfie តែមួយមុខ អាចមានភាពមិនច្បាស់លាស់សម្រាប់អាយុចន្លោះ ១៦ ឆ្នាំ។ ដូច្នេះ ការប្រើប្រាស់ព័ត៌មានពីធនាគារ នឹងជួយធានាបាននូវភាពត្រឹមត្រូវខ្ពស់។

លោក Andrew Black នាយកគ្រប់គ្រងរបស់ ConnectID បាននិយាយថា ពួកគេបានធ្វើការជាមួយដៃគូធំៗជាច្រើនក្នុងរយៈពេលប៉ុន្មានឆ្នាំមកនេះ ហើយការធានាអាយុសម្រាប់បណ្តាញសង្គមនេះ គឺជាចំណុចដ៏សំខាន់មួយ។ ក្រុមហ៊ុនទាំងពីរមានគោលដៅចង់ពង្រីកភាពជាដៃគូនេះទៅកាន់វេទិកាហ្គេមផងដែរ ដើម្បីជួយបង្កើតបរិយាកាសដែលមានសុវត្ថិភាពសម្រាប់អ្នកប្រើប្រាស់វ័យក្មេង។

គួរជម្រាបថា ភាពជាដៃគូដ៏ពិសេសនេះ ត្រូវបានគេរំពឹងថា នឹងដើរតួនាទីយ៉ាងសំខាន់ក្នុងការអនុវត្តច្បាប់ថ្មីរបស់អូស្ត្រាលី ដែលមានគោលបំណងការពារក្មេងជំទង់ពីខ្លឹមសារមិនសមរម្យនៅលើអ៊ីនធឺណិត៕