(បរទេស)៖​ ក្រុមហ៊ុនបច្ចេកវិទ្យា DeepSeek របស់ចិន បានបង្ហាញថាខ្លួនចំណាយប្រាក់តែ ២៩៤,០០០ ដុល្លារ​ ដេីម្បីបណ្ដុះបណ្តាលម៉ូដែល AI ថ្មី​ ដែលកំពុងមានប្រជាប្រិយភាព។ តម្លៃនេះ ត្រូវបានគេពិចារណាថា ទាបជាងគូប្រកួតនៅសហរដ្ឋអាមេរិកយ៉ាងខ្លាំង ដែលតែងតែចំណាយជាច្រើនសែនលានដុល្លារសម្រាប់បណ្ដុះម៉ូដែលធំៗ។

តាមរបាយការណ៍របស់ DeepSeek ម៉ូដែល R1 ត្រូវបានបណ្ដុះបណ្តាលដោយប្រើកាតក្រាហ្វិក Nvidia H800 ចំនួន ៥១២ គ្រាប់ជាការប្រមូលផ្តុំ ហើយចំណាយពេលត្រឹមតែ ៨០ម៉ោងប៉ុណ្ណោះ។ ក្នុងដំណាក់កាលដំបូង ក្រុមហ៊ុនក៏បានប្រើកាត A100 សម្រាប់ការសាកល្បងផងដែរ។​ ម៉ូដែល R1 ត្រូវបានគេពិពណ៌នាថា ជា AI ផ្តោតលើការទាញហេតុផល (reasoning) ដែលអាចដោះស្រាយបញ្ហាគណិតវិទ្យា កូដកម្មវិធី និងភារកិច្ចចម្រុះផ្សេងៗ។ វាប្រើបច្ចេកទេស reinforcement learning ដើម្បីអោយ AI អភិវឌ្ឍតាមរបៀប “សាកល្បង និងកែតម្រូវ” ដោយមានការផ្តល់រង្វាន់ប្រសិនបើឆ្លើយត្រឹមត្រូវ។

អ្នកវិភាគបានបញ្ជាក់ថា បើការអះអាងនេះពិតប្រាកដ នោះវានឹងអាចប្តូរគំនិតនៅក្នុងឧស្សាហកម្ម AI ព្រោះបង្ហាញថា ការបណ្ដុះម៉ូដែលមានប្រសិទ្ធភាពមិនចាំបាច់ចំណាយថ្លៃដល់សែនលានដុល្លារទេ។ ទោះយ៉ាងណា មានអ្នកជំនាញខ្លះសង្ស័យ ព្រោះចំនួន ២៩៤,០០០ ដុល្លារនេះ គ្រាន់តែជាចំណាយ សម្រាប់ដំណាក់កាលបណ្ដុះបណ្តាលផ្ទាល់ មិនរាប់បញ្ចូលចំណាយស្រាវជ្រាវ អភិវឌ្ឍន៍ ការរៀបចំទិន្នន័យ និងហេដ្ឋារចនាសម្ព័ន្ធផ្សេងៗទេ។​ ការចំណាយទាបនេះ ក៏កើតឡើងក្នុងបរិបទដែលចិនកំពុងជួបការរឹតបន្តឹងផ្នែកឧបករណ៍បច្ចេកវិទ្យាពីសហរដ្ឋអាមេរិក ដោយកាត់ផ្គត់ផ្គង់​ GPU ប្រភេទខ្លាំងៗដូចជា H100 និង A100។ ដោយហេតុនេះ DeepSeek បានជ្រើសប្រើ H800 ជាឧបករណ៍ចម្បង។

អ្នកជំនាញនិយាយថា ប្រសិនបើទិន្នន័យនេះត្រូវបានបញ្ជាក់ថា ពិតប្រាកដ នោះវាអាចបង្កើនសម្ពាធដល់ក្រុមហ៊ុនធំៗ ដូចជា OpenAI ឬ Anthropic ដែលតែងតែប្រើថវិកាបណ្ដុះបណ្តាលម៉ូដែលក្នុងកម្រិតជាង ១០០ លានដុល្លារឡើងទៅ៕