(បរទេស)៖ TikTok ព្រមព្រៀងធ្វើការកែលម្អវិធានការ ដើម្បីទប់ស្កាត់កុមារមិនឲ្យប្រើប្រាស់គេហទំព័រ និងកម្មវិធីរបស់ខ្លួន បន្ទាប់ពីរបាយការណ៍ស៊ើបអង្កេតរបស់កាណាដាបានរកឃើញថា វិធានការចាស់មិនគ្រប់គ្រាន់ក្នុងការការពារកុមារ និងព័ត៌មានផ្ទាល់ខ្លួនរបស់ពួកគេ។ នេះជាសេចក្តីប្រកាសពីអាជ្ញាធរឯកជនភាពកាណាដា នៅថ្ងៃអង្គារសប្តាហ៍នេះ។
ការស៊ើបអង្កេតនេះ ដឹកនាំដោយលោក Philippe Dufresne អាជ្ញាធរផ្នែកឯកជនភាពកាណាដា រួមជាមួយអាជ្ញាធរប្រយុទ្ធប្រឆាំងការរំលោភឯកជនភាព។

ទោះបីជា TikTok ប្រកាសថាវេទិការបស់ខ្លួនមិនមែនសម្រាប់អ្នកមានអាយុក្រោម ១៣ឆ្នាំក៏ដោយ អ្វីដែលមានក្នុងការស៊ើបអង្កេតគឺរកឃើញថា TikTok បានប្រមូល ព័ត៌មានផ្ទាល់ខ្លួនដែលបង្ហាញពីអារម្មណ៍សម្ងាត់ពីកុមារកាណាដាក្នុងចំនួនច្រើន។ TikTok បានប្រើព័ត៌មាននោះសម្រាប់ផ្សព្វផ្សាយតាមអ៊ីនធឺណិត និងបំពានគោលដៅមាតិកា (targeted content)។ លោក Dufresne បាននិយាយក្នុងសន្និសីទសារព័ត៌មានថា «TikTok កំពុងប្រមូលព័ត៌មានផ្ទាល់ខ្លួនយ៉ាងច្រើនពីអ្នកប្រើប្រាស់របស់ខ្លួន រួមទាំងកុមារ។ ព័ត៌មានទាំងនេះត្រូវបានប្រើសម្រាប់ការបំពានគោលដៅមាតិកា និងការផ្សាយពាណិជ្ជកម្ម ដែលអាចបណ្តាលឲ្យមានផលប៉ះពាល់អវិជ្ជមាន ជាពិសេសចំពោះយុវជន»។

ជាការឆ្លើយតប TikTok បានព្រមព្រៀងដើម្បី កែលម្អវិធីសាស្ត្រដើម្បីផ្ទៀងផ្ទាត់អាយុអ្នកប្រើប្រាស់ ដើម្បីទប់ស្កាត់អ្នកមានអាយុក្រោម ១៣ មិនឲ្យប្រើកម្មវិធី។ ធ្វើឲ្យការទំនាក់ទំនង និងព័ត៌មានឯកជនភាពមានភាពច្បាស់លាស់ ឲ្យកាន់តែងាយស្រួលយល់ សម្រាប់អ្នកប្រើប្រាស់ ជាពិសេសកុមារ។ រារាំងការផ្សាយពាណិជ្ជកម្មដោយផ្អែកលើព័ត៌មានសំខាន់ៗទៅកាន់អ្នកក្រោមអាយុ ១៨ ឆ្នាំ។ ពង្រឹងព័ត៌មានអំពីឯកជនភាព សម្រាប់អ្នកប្រើប្រាស់កាណាដា។ ក្រុមការងាររបស់ TikTok បានឲ្យដឹងក្នុងសេចក្តីថ្លែងការណ៍ថា «យើងមានភាពរីករាយដែលអាជ្ញាធរឯកជនភាពបានយល់ព្រមលើសំណើជាច្រើនរបស់យើង ក្នុងគោលបំណងពង្រឹងសុវត្ថិភាព និងភាពច្បាស់លាស់សម្រាប់អ្នកប្រើប្រាស់កាណាដា។ បើទោះបីជាយើងមិនយល់ព្រមនឹងលទ្ធផលខ្លះៗក្នុងរបាយការណ៍ក៏ដោយ យើងនៅតែប្តេជ្ញាការពារទិន្នន័យឯកជន និងភាពត្រឹមត្រូវរបស់វេទិការបស់យើង»។

គួរជម្រាបថាកាណាដាបានចូលរួមជាមួយអាជ្ញាធរនៃប្រទេសជាច្រើនទៀតលើពិភពលោក ដែលកំពុងស៊ើបអង្កេត TikTok ដោយសារមានការព្រួយបារម្ភថា រដ្ឋាភិបាលចិនអាចប្រើ TikTok ដើម្បីប្រមូលព័ត៌មានឯកជនរបស់អ្នកប្រើប្រាស់។ TikTok ជាកម្មសិទ្ធិរបស់ក្រុមហ៊ុនចិន ByteDance Ltd. ហើយពេលនេះសភាសហរដ្ឋអាមេរិក បានចេញសំណើច្បាប់ទាមទារ TikTok ផ្ទេរសម្បត្តិទៅម្ចាស់ជនជាតិអាមេរិក តែសេចក្តីសម្រេចយ៉ាងណានោះគេនៅមិនទាន់ដឹងទេ៕