(បរទេស)៖ នៅប្រទេសជប៉ុន ការផឹកស្រាបន្ទាប់ពីធ្វើការជាមួយមិត្តរួមការងារ ឬអតិថិជន ដែលត្រូវបានគេស្គាល់ថា ណូមីកៃ (nomikai - 飲み会) ត្រូវបានគេមើលឃើញយ៉ាងទូលំទូលាយ​ថាជា​មធ្យោបាយមួយក្នុងការកសាងទំនុកចិត្ត ពង្រឹងទំនាក់ទំនង និងបង្ហាញពីភាពស្មោះត្រង់ចំពោះក្រុមហ៊ុន។ យោងតាមការសិក្សាវប្បធម៌ និងការស្ទង់មតិនៅកន្លែងធ្វើការដែលដកស្រង់ដោយ BBC និង The Japan Times ការជួបជុំទាំងនេះត្រូវបានចាត់ទុកថា ជាការបង្ហាញអារម្មណ៍ពិត ដោយគ្មានគិតពីឋានានុក្រម​នៃអ្នកដែល​ចូលរួម និងការសន្ទនាបើកចំហត្រូវបានលើកទឹកចិត្ត។

មុខងារចម្បងនៃ ណូមីកៃ គឺដើម្បីបង្កើតបរិយាកាសសម្រាប់ការទំនាក់ទំនងដែលបរិស្ថានការិយាល័យផ្លូវការមិនអនុញ្ញាត។ នៅក្នុងក្រុមហ៊ុនជប៉ុន ការរក្សាគម្លាតសង្គមដ៏តឹងរ៉ឹង និងការគោរពតាម​ឋានានុក្រមគឺជាកត្តាចាំបាច់ក្នុងម៉ោងការងារ ដូច្នេះហើយទើបពិធីជប់លៀង «ណូមីកៃ» បានក្លាយជាច្រកចេញដ៏ចាំបាច់មួយសម្រាប់បុគ្គលិក។ សម្រាប់ពាក្យ «ណូមីនីខេសិន (nominication)» វាជាការផ្សំបញ្ចូលគ្នារវាង nomu (ផឹក) និង communication (ទំនាក់ទំនង)។

ណូមីនីខេសិន បញ្ជាក់ពីជំនឿដែលថា គ្រឿងស្រវឹងដើរតួជាអ្នកសម្របសម្រួលសម្រាប់ទំនាក់ទំនងសង្គម។ វាមានសារៈសំខាន់សម្រាប់ការកសាងដើមទុនសង្គម និងចំណងមិត្តភាពពិតប្រាកដ។ ដោយសារតែកន្លែងធ្វើការកម្រអនុញ្ញាតឱ្យបុគ្គលិកបង្ហាញអារម្មណ៍ពិតរបស់ពួកគេ (honne) នោះ បរិយាកាសផឹកស៊ីគឺជាកន្លែងដែលត្រូវបានអនុញ្ញាតឱ្យមានការពិភាក្សាដោយត្រង់ៗ។ នៅទីនេះ រឿងរ៉ាវផ្ទាល់ខ្លួនត្រូវបានចែករំលែក ការត្អូញត្អែរត្រូវបានបញ្ចេញ ហើយការយល់ដឹងកាន់តែស៊ីជម្រៅរវាងមិត្តរួមការងារត្រូវបានបង្កើតឡើង ដែលបន្ទាប់មកត្រូវបានគេរំពឹងថា នឹងប្រែទៅជា​កិច្ចសហប្រតិបត្តិកា​រកាន់តែរលូននៅពេលត្រឡប់ទៅការិយាល័យវិញ។

គោលបំណងធំមួយនៅក្នុងពិធីជួបជុំ ណូមីកៃ គឺវាជាកន្លែងដែល «គ្មានឋានានុក្រម»។ ថ្នាក់លើ និងថ្នាក់ក្រោមអាចនិយាយបានកាន់តែបើកចំហ ចែករំលែករឿងកំប្លែង រឿងសោកសៅ បញ្ហាផ្សេងៗ។

ការជួបជុំទាំងនេះត្រូវបានចាត់ទុកថាជា ការបន្តម៉ោងធ្វើការ ដោយយោងតាមការសិក្សាវប្បធម៌មួយចំនួន ដែលភក្ដីភាព និងការប្ដេជ្ញាចិត្តដែលបានបង្ហាញ ត្រូវបានគេមើលឃើញថា ជាផ្នែកមួយនៃ​ភាពស្មោះត្រង់​របស់បុគ្គលចំពោះក្រុមហ៊ុន ហើយអាចមានឥទ្ធិពលទៅលើការរីកចម្រើនក្នុងអាជីព។

ត្បិតតែវាជាការចូលរួមដោយ «គ្មានឋានានុក្រម»​ ក្ដី ប៉ុន្តែវាក៏ត្រូវបានកំណត់នូវក្រមសីលធម៌ផងដែរ ដូចជាការជល់កែវ គឺត្រូវតែធ្វើឡើងដោយអ្នករៀបចំ ឬមនុស្សចាស់ជាងគេនៅតុនិយាយពាក្យថា «Kanpai! (លើកកែវ!)» ទើបអ្នកចូលរួមអាចផឹកបាន ហើយភេសជ្ជៈដំបូងតែងតែជាស្រាបៀរ។ ចំណុចមួយដ៏សំខាន់បំផុតទៀតនោះគឺ វិធានមាស «មិនត្រូវចាក់ភេសជ្ជៈដោយខ្លួនឯងជាដាច់ខាត»។ ផ្ទុយទៅវិញ មិត្តរួមការងារវ័យក្មេង (ជាពិសេសបុគ្គលិកថ្មី) ត្រូវតែតាមដានកែវរបស់ថ្នាក់លើរបស់ពួកគេដោយយកចិត្តទុកដាក់។ ការចាក់ភេសជ្ជៈជូនថៅកែ គឺជាមធ្យោបាយជាក់ស្តែង​មួយ​ដើម្បី​បង្ហាញ​ពី​ការ​យកចិត្តទុកដាក់ និងការគោរព។ ចំណែកនៅពេលជល់កែវ អ្នកដែលមានឋានៈទាបត្រូវកាន់កែវរបស់ពួកគេ ទាបជាង កែវរបស់ថ្នាក់លើដើម្បីបង្ហាញការគោរព។

ការជួបជុំទាំងនេះភាគច្រើនគឺធ្វើឡើងរហូតដល់ ៣ជុំ។ ដោយការជួបជុំផ្លូវការគឺ ichijikai (ជប់លៀងដំបូង)។ ជារឿយៗវាត្រូវបានបន្តដោយ nijikai (ជុំទីពីរ) នៅកន្លែងផ្សេង ដូចជាហាងខារ៉ាអូខេ ឬបារតូចមួយ ហើយជួនកាល sanjikai (ជុំទីបី) នៅហាងលក់អាហារ «រ៉ាមេន - Ramen Japanese» ដើម្បីកាត់បន្ថយការស្រវឹង។ ត្បិតតែការជួបជុំផឹកស៊ីនេះមានអ្នកខ្លះឈានដល់ការស្រវឹង​ក្ដី ប៉ុន្តែរាល់អ្នកដែលបានចូលរួមគឺត្រូវរក្សានូវគោលការណ៍សុវត្ថិភាពផ្ទាល់ខ្លួនពេលត្រឡប់ទៅផ្ទះវិញ និងព្រឹកថ្ងៃបន្ទាប់គឺពួកគេត្រឡប់ទៅធ្វើការវិញតាមតួនាទីរបស់ខ្លួន ហើយរឿងរ៉ាវដែលកើតឡើង​នៅ​ពេលយប់​ត្រូវបានបំភ្លេចចោល ឬអត់ឱនឱ្យ។

ត្បិតតែវាជាការជួបជុំដ៏ប្រពៃណី និងទម្លាប់មួយល្អក៏ពិតមែន ប៉ុន្តែវាក៏ទទួលបានការរិះគន់ជាច្រើនផងដែរ។ ការរិះគន់ដ៏ធំបំផុតគឺថា ខណៈពេលដែលការចូលរួមគឺជាការស្ម័គ្រចិត្ត ប៉ុន្តែការបដិសេធ​ការ​អញ្ជើញពីថ្នាក់លើផ្ទាល់ ត្រូវបានគេយល់ថា ជាការបដិសេធមិនធ្វើជាផ្នែកមួយនៃក្រុម ដែលអាចនាំឱ្យមាន ការរើសអើង ឬផលវិបាកអវិជ្ជមានសម្រាប់​វឌ្ឍនភាពអាជីព​នាពេលអនាគត។ វប្បធម៌ណូមីកៃ ត្រូវបានចាត់ទុកថាជា «ការបន្តម៉ោងធ្វើការ ឬការធ្វើការបន្ថែមម៉ោង» ប៉ុន្តែវាមិនទទួលបានប្រាក់កម្រៃតាមរយៈការលះបង់ពេលវេលាផ្ទាល់ខ្លួន ឬក្រុមគ្រួសារ។

នៅក្នុងពិធីជួបជុំ «ណូមីកៃ» ត្រូវបានគេរកឃើញថា មានការបង្ខិតបង្ខំអ្នកមិនផឹកឱ្យបរិភោគគ្រឿងស្រវឹង ការចាក់ស្រាចូលក្នុងកែវដែលពេញជាបន្តបន្ទាប់ ឬការចំអកទៅកាន់ចំពោះអ្នកដែល​មិនផឹកស្រា (ផឹកទឹកក្រូច ឬទឹកសុទ្ធជំនួស)។ សកម្មភាពនេះគឺវាបានកើតមានឡើងជាញឹកញាប់នៅក្នុងពិធីសង្គមមួយនេះ។ ការស្ទង់មតិឆ្នាំ ២០២៣ បានបង្ហាញថា ជិត ៨០% នៃអ្នកឆ្លើយតប ចាត់ទុកការរិះគន់ចំពោះការមិនចូលរួមពិធីជប់លៀងផឹកស៊ីថាជា «ការយាយី»។

ទំនាក់ទំនងដ៏រឹងមាំរវាង វប្បធម៌ផឹកស៊ីរបស់ជប៉ុន និងប្រពៃណីរបស់បុរសក្នុងសាជីវកម្ម ជារឿយៗរារាំងអ្នកដែលមានកាតព្វកិច្ចគ្រួសារ ដូចជាម្ដាយដែលធ្វើការ និងឪពុក ក៏ដូចជាបុគ្គលិកបរទេសដែលពិបាកក្នុងការបន្សាំខ្លួនជាមួយទំនៀមទម្លាប់ ឬមិនផឹកស្រា៕