(បរទេស)៖ ខណៈដែលទីផ្សារស្មាតហ្វូនអេក្រង់បត់កំពុងតែផ្ទុះខ្លាំងដោយមានក្រុមហ៊ុនផលិតស្មាតហ្វូនធំៗជាច្រើនបាននិងកំពុងតែប្រជែងទីផ្សារគ្នានោះ គេសង្កេតឃើញថា Apple ដែលជាក្រុមហ៊ុនផលិតស្មាតហ្វូនលំដាប់កំពូលបែរជានៅស្ងៀមមិនចាប់អារម្មណ៍នឹងស្មាតហ្វូនអេក្រង់បត់នេះទាល់តែសោះ។

មានមតិជាច្រើនបានលើកឡើងផ្សេងគ្នាអំពីភាពស្ងប់ស្ងាត់របស់ Apple ដោយអ្នកខ្លះបាននិយាយថា Apple មិនចង់ឈានជើងចូលទីផ្សារមួយនេះ អ្នកខ្លះទៀតថា Apple សំងំផលិត iPhone អេក្រង់បត់ដែលអស្ចារ្យ ចេញយឺតប៉ុន្តែពោរពេញដោយគុណភាព។ ដោយឡែកថ្មីៗនេះ មានព័ត៌មានជាច្រើនបានទម្លាយមកថា នៅឆ្នាំក្រោយនេះ Apple នឹង​ប្រកាស​ចេញ​ទូរស័ព្ទ iPhone បត់​បាន​ដំបូង​របស់​ខ្លួន ដែល​យើង​ហៅ​ថា «iPhone Fold» ជាឈ្មោះ ងាយស្រួលហៅ និងចងចាំ។

យោង​តាម​កំណត់​សម្គាល់​ថ្មី​របស់​អ្នក​វិនិយោគ​ Jeff Pu ដែល​ជា​ប្រភព​ព័ត៌មាន​ Apple ដ៏​ល្បីល្បាញ​មួយ​រូប បាន​ឱ្យ​ដឹង​ថា iPhone Fold នឹង​ប្រើ​ការ​រួម​បញ្ចូល​គ្នា​រវាង​ទីតាញ៉ូម (titanium) និង អាលុយមីញ៉ូម (aluminum) នៅ​ក្នុង​តួ​របស់​វា (frame)។

នេះ​ជា​រឿង​គួរ​ឲ្យ​ចាប់អារម្មណ៍​ព្រោះ​ថា iPhone ម៉ូដែល Pro ធ្លាប់​បាន​ប្តូរ​ពី​ដែក​អ៊ីណុក (stainless steel) ទៅ​ជា​ទីតាញ៉ូម​កាលពី​មួយ​រយៈ​មុន ហើយ​បន្ទាប់​មក ​ឆ្នាំ​នេះ​ក្នុង​ម៉ូដែល iPhone 17 Pro និង Pro Max ក៏​បាន​ប្តូរ​ទៅ​ប្រើ​អាលុយមីញ៉ូម​វិញ។

ពាក្យ​ចចាមអារ៉ាម​មុន​នេះ​ដោយលោក Ming-Chi Kuo ដែល​ជា​អ្នក​វិភាគ​ម្នាក់​ទៀត​មាន​ទំនាក់ទំនង​យ៉ាង​ជិតស្និទ្ធ​ជាមួយ​ខ្សែ​សង្វាក់​ផ្គត់ផ្គង់​របស់ Apple នៅ​អាស៊ី បាន​អះអាង​ថា តួ​របស់ iPhone Fold នឹង​ត្រូវ​បាន​ផលិត​ឡើង​ទាំងស្រុង​ពី​ទីតាញ៉ូម ខណៈ​ដែល​មួយចំនួនទៀតនឹង​ប្រើ​ទាំង​ទីតាញ៉ូម និង​អាលុយមីញ៉ូម។ តើអ្នក​ទាំងពីរ​នេះ​ អាច​យល់​ខុស​គ្នា ឬ Apple បាន​ផ្លាស់ប្តូរ​ការ​សម្រេចចិត្ត​របស់​ខ្លួន​នៅ​ពេល​នោះ?

iPhone Fold ត្រូវ​បាន​គេ​រំពឹង​ថា​នឹង​មាន​អេក្រង់​ខាងក្រៅ​ទំហំ 5.5 អ៊ីញ និង​អេក្រង់​បត់​​ទំហំ 7.8 អ៊ីញ។ គេ​សង្ស័យ​ថា​ វា​នឹង​អត់​មាន​មុខងារ Face ID ទេ ហើយ​នឹង​ប្រើ Touch ID វិញ។ ប្រព័ន្ធ​ប្រតិបត្តិការ iOS 27 ដែល​នឹង​ចេញ​នៅ​ឆ្នាំ​ក្រោយ ត្រូវ​បាន​គេ​និយាយ​ថា​នឹង​ផ្តោត​សំខាន់​លើ​ការ​បន្ថែម​លក្ខណៈ​ពិសេស​ថ្មីៗ​សម្រាប់​តែ​ទម្រង់​ពិសេស (ប្លែក​ពី iPhone ផ្សេង​ទៀត) របស់ iPhone Fold៕