Samsung អេក្រង់បត់ ៣តង់ Galaxy Z TriFold នឹងប្រើថ្មរហូតដល់ ៣ដុំ ត្រៀមចេញក្នុងខែតុលានេះ
10-10-2025 10:29
(បរទេស)៖ ក្រុមហ៊ុនបច្ចេកវិទ្យាយក្ស Samsung កំពុងត្រៀមប្រកាសចេញស្មាតហ្វូនអេក្រង់បត់ ៣ តង់ (Tri-fold) ដំបូងរបស់ខ្លួននៅឆ្នាំនេះ ដែលត្រូវបានដាក់ឈ្មោះបណ្ដោះអាសន្នថា Galaxy Z TriFold។ យោងតាមឯកសារប៉ាតង់ដែលចេញផ្សាយដោយ KIPRIS ថ្មីៗនេះ បានទម្លាយឲ្យដឹងថា ស្មាតហ្វូនជំនាន់ថ្មីនេះនឹងបំពាក់មកជាមួយ កោសិកាថ្មចំនួន ៣ ដុំ ទៅតាមផ្នែកបត់ទាំង ៣ របស់វា។ នេះបើតាមការចេញផ្សាយរបស់ GSMArena នៅថ្ងៃទី០៩ ខែតុលា ឆ្នាំ២០២៥។
តាមរយៈគំនូរព្រាងក្នុងឯកសារប៉ាតង់ ថ្មតូចបំផុត (T1) ត្រូវបានដាក់នៅផ្នែកកាមេរ៉ាក្រោយ ចំណែកថ្មធំលំដាប់ទីពីរ (T3) ស្ថិតនៅផ្នែកអេក្រង់ខាងក្រៅ (cover display) និងថ្មធំជាងគេ (T2) ស្ថិតនៅផ្នែកកណ្ដាលដែលជាផ្នែកខ្ទប់នៅពេលបត់។ ថ្វីត្បិតតែឯកសារនេះមិនបញ្ជាក់ពីទំហំថ្មសរុបក្តី អ្នកជំនាញរំពឹងថាសមត្ថភាពថ្មសរុបនឹងប្រសើរជាង Galaxy Z Fold7 ដែលមានត្រឹមតែ 4,400 mAh (មីលីអំពែម៉ោង) និងល្បឿនសាក ២៥ វ៉ាត់ (25W) ប៉ុណ្ណោះ។
គួរជម្រាបថា ដំបូងឡើយ Galaxy Z TriFold ត្រូវបានគេលេចលឺថា នឹងលក់ផ្តាច់មុខនៅកូរ៉េខាងត្បូង និងចិន តែព័ត៌មានថ្មីៗបង្ហាញថា វាក៏អាចនឹងមានវត្តមាននៅសហរដ្ឋអាមេរិកផងដែរ។ សម្រាប់កាលបរិច្ឆេទប្រកាសចេញ ត្រូវបានគេអះអាងថា អាចនឹងធ្វើឡើងនៅ ចុងខែតុលា នេះតែម្ដង។ ជាមួយគ្នានេះ ក្រុមហ៊ុន Samsung ក៏នឹងប្រកាសចេញ កាសបញ្ញាសិប្បនិម្មិត Android XR (Project Moohan) ដំបូងរបស់ខ្លួននៅខែនេះផងដែរ ដោយការចុះឈ្មោះជាមុននៅកូរ៉េខាងត្បូង ត្រូវបានកំណត់ពីថ្ងៃទី ១៥ ដល់ ២១ ខែតុលា មុននឹងប្រកាសចេញផ្លូវការនៅថ្ងៃទី ២២ ខែតុលា៕
