ទីបំផុត! Apple និង Meta ជិតបញ្ចប់បញ្ហាច្បាប់ដ៏ធំនៅ EU ព្រមទាំងរួចផុតពីការពិន័យដ៏ច្រើនសន្ធឹកសន្ធាប់
10-10-2025 11:25
(បរទេស)៖ ក្រុមហ៊ុនបច្ចេកវិទ្យាធំៗរបស់អាមេរិក គឺ Apple និង Meta Platforms កំពុងឈានដល់កិច្ចព្រមព្រៀងសម្រុះសម្រួលក្នុងសំណុំរឿងប្រឆាំងនឹងការប្រកួតប្រជែងជាមួយ គណៈកម្មការអឺរ៉ុប (EC) ដែលនឹងជួយឲ្យក្រុមហ៊ុនទាំងពីរនេះជៀសវាងការពិន័យបន្ថែមដ៏ច្រើនសន្ធឹកសន្ធាប់។ នេះបើយោងតាមការចុះផ្សាយរបស់ Financial Times ដោយដកស្រង់សម្ដីមន្ត្រីអឺរ៉ុបដែលបានដឹងពីកិច្ចពិភាក្សា និងត្រូវបានចេញផ្សាយបន្តដោយ GSMArena។
យ៉ាងណាមិញ ព័ត៌មាននេះមិនទាន់ត្រូវបានប្រកាសជាផ្លូវការនោះទេ ប៉ុន្តែមន្ត្រីអឺរ៉ុបទាំងនោះបានបង្ហាញពី «ក្ដីសង្ឃឹមកាន់តែខ្លាំង» ក្នុងការស្វែងរក «ដំណោះស្រាយដែលអាចអនុវត្តបាន»។ សម្រាប់ Meta បញ្ហាចម្បងគឺទាក់ទងនឹងម៉ូដែល «Pay or Consent» (បង់ប្រាក់ ឬយល់ព្រម) ដែលតម្រូវឲ្យអ្នកប្រើប្រាស់នៅអឺរ៉ុប (EU) ត្រូវតែយល់ព្រមលើការតាមដានទិន្នន័យដើម្បីទទួលបានសេវាឥតគិតថ្លៃ ឬបង់ថ្លៃជាវប្រចាំខែដើម្បីបញ្ឈប់ការតាមដាន។ Meta ធ្លាប់ត្រូវបានពិន័យប្រមាណ ២០០ លានអឺរ៉ូ រួចមកហើយលើករណីនេះ ខណៈបញ្ហាដែលនៅសេសសល់គឺការធានាឲ្យអ្នកប្រើប្រាស់អាចស្វែងរកជម្រើសផ្សេងៗបានយ៉ាងងាយស្រួល។
ចំណែកឯ Apple វិញ ក្រុមហ៊ុនបានធ្វើការកែប្រែគោលនយោបាយ App Store ដែលរំលោភច្បាប់មួយចំនួនរួចហើយកាលពីខែមិថុនា។ បច្ចុប្បន្ន EC កំពុងបន្តពិភាក្សាជាមួយ Apple អំពីលក្ខខណ្ឌកិច្ចសន្យាថ្មីជាមួយអ្នកអភិវឌ្ឍន៍។ ប្រភពដែលដឹងពីកិច្ចពិភាក្សាទាំងនេះបានបង្ហាញក្ដីសង្ឃឹមថា ករណីនេះនឹងត្រូវដោះស្រាយក្នុងពេលឆាប់ៗខាងមុខ។ ប្រសិនបើការសម្រុះសម្រួលនេះទទួលបានជោគជ័យ ក្រុមហ៊ុនបច្ចេកវិទ្យាទាំងពីរនឹងជៀសវាងការបង់ពិន័យប្រចាំថ្ងៃ ដែលអាចកើនឡើងដល់ទៅ ៥% នៃប្រាក់ចំណូលជាមធ្យមសរុបទូទាំងពិភពលោក របស់ពួកគេ៕
