(ភ្នំពេញ)៖ ធនាគារ ប្រ៊ីដ និងក្រុមហ៊ុនសៃសាន់ ប្រាឌើរ ហូលឌីង បានចុះអនុស្សរណៈនៃការយោគយល់គ្នា ដើម្បីផ្តល់ការគាំទ្រផ្នែកហិរញ្ញវត្ថុឱ្យ Sub Franchise លើការទិញម៉ាកយីហោ emart24 និង Mega MGC Coffee។
ពិធីចុះហត្ថលេខានេះត្រូវបានប្រារព្ធឡើងនៅ ថ្ងៃទី៨ ខែតុលា ឆ្នាំ២០២៥ នៅ សណ្ឋាគារ Shangri-La រាជធានីភ្នំពេញ។

តាមរយៈភាពជាដៃគូនេះ អ្នកចាប់ផ្ដើមអាជីវកម្មថ្មីនឹងទទួលបានការផ្ដល់ប្រាក់កម្ចីយ៉ាងងាយស្រួលពីធនាគារ ប្រ៊ីដ រហូតដល់ ៨០% នៃទុនសរុបដែលត្រូវការដើម្បីវិនិយោគ លើការទិញម៉ាកយីហោ emart24 និង Mega MGC Coffee ក្នុងអត្រាការប្រាក់ទាប ជាមួយនឹងរយៈពេលកម្ចីរហូតដល់១៥ឆ្នំា ដើម្បីជួយសម្រួលដល់ការចាប់ផ្ដើមនិងការដំណើរការអាជីវកម្ម Sub Franchise របស់ពួកគេ។

លោក Richard Liew នាយកប្រតិបត្តិនៃធនាគារប្រ៊ីដ បានថ្លែងថា «ការប្ដេជ្ញាចិត្តរបស់យើងគឺដើម្បីផ្ដល់ការគាំទ្រដល់សហគ្រិននៅទូទាំងប្រទេស។ កិច្ចសហប្រតិបត្តិការជាមួយ ក្រុមហ៊ុនសៃសាន់ ប្រាឌើរ ហូលឌីង នឹងបើកឱកាសដ៏ល្អមួយសម្រាប់អ្នកដែលមានក្ដីស្រមៃចង់ក្លាយជាម្ចាស់អាជីវកម្មផ្ទាល់ខ្លួន។ យើងមានសេចក្ដីសោមនស្សរីករាយក្នុងការក្លាយជាដៃគូហិរញ្ញវត្ថុក្នុងដំណើរផ្លូវនេះ»។

ចំណែកលោក Dr. Goh Swee Keong នាយកគ្រប់គ្រងនៃក្រុមហ៊ុនសៃសាន់បានបន្ថែមថា «ភាពជាដៃគូជាមួយធនាគារប្រ៊ីដ មិនត្រឹមតែពង្រឹងម៉ាកយីហោរបស់យើងប៉ុណ្ណោះទេ តែថែមទាំងផ្ដល់អត្ថប្រយោជន៍ដ៏ធំធេងដល់ដៃគូ Sub Franchise របស់យើងទៀតផង។ យើងចង់ឃើញសហគ្រិនថ្មីៗជាច្រើនទៀតទទួលបានជោគជ័យ ហើយយើងជឿជាក់ថា ភាពជាដៃគូនេះនឹងជួយឲ្យគោលដៅនេះក្លាយជាការពិត»។

ក្រុមហ៊ុនសៃសាន់ ប្រាឌើរ ហូលឌីង ជាសាជីវកម្មល្បីល្បាញទៅលើវិស័យជាច្រើនដូចជា វិស័យម្ហូបអាហារ (Food & Beverage) វិស័យលក់រាយ (Retail) វិស័យបច្ចេកវិទ្យា (Technology) និងវិស័យសំណង់ (Construction) វិស័យឧបករណ៍អេឡិចត្រូនិក (Electronic compliance) និងវិស័យកសិកម្ម (Agriculture)។

សម្រាប់ក្រុមហ៊ុនសៃសាន់ បាននាំយកយីហោ emart24 ចូលក្នុងទីផ្សារប្រទេសកម្ពុជានៅឆ្នាំ ២០២៣ ដែលរហូតមកដល់ឆ្នាំ ២០២៥ នេះបានពង្រឹកសាខារហូតដល់ ៧សាខានិងគ្រោងបើកជាបន្តបន្ទាប់។ emart24 ជាផ្សារលក់ទំនិញរាយដែលបើកដំណើរការ ២៤ម៉ោង ចាប់តាំងពីកាហ្វេពេលព្រឹករហូតដល់អាហារសម្រន់ពេលយប់។ ជាមួយនិងការផ្តល់អោយនូវម្ហូបកូរ៉េដ៏សម្បូរបែប និងគ្រាប់កាហ្វេអារ៉ាប៊ីកាសុទ្ធ ១០០% ដែលនាំចូលដោយផ្ទាល់ពីកោះ Jeju ប្រទេសកូរ៉េ emart24 បានចូលរួមយ៉ាងសកម្មក្នុងការគាំទ្រផលិតផលក្នុងស្រុក ដោយថ្មីៗនេះ emart24 បានបង្កើតយុទ្ធនាការគាំទ្រផលិតខ្មែរ អនុញ្ញាតឱ្យអ្នកផលិត ប្រជាកសិករ និងអ្នកនាំចេញទាំងឡាយដាក់តាំងលក់ផលិតផលខ្មែរ ក្នុងគោលបំណងផ្គត់ផ្គង់តម្រូវការរបស់ប្រជាពលរដ្ឋ។ គោលដៅចំបងរបស់ emart24 គឺត្រូវតែមានជាដាច់ខាតនូវផលិតផលខ្មែរ ៣០% ដាក់តាំងលក់នៅគ្រប់សាខាទាំងអស់របស់ emart24។

រីឯ Mega MGC Coffee ជាម៉ាកយីហោហាងកាហ្វេដែលល្បីនៅប្រទេសកូរ៉េខាងត្បូងត្រូវបានទទួលស្គាល់ពីតម្លៃសមរម្យ និងភាពសំបូរបែប ឆ្ងាញ់ពិសា និងគុណភាពខ្ពស់នៃភេសជ្ជៈដែលបច្ចុប្បន្នហាងកាហ្វេនេះមានរហូតដល់ ៣៩០០សាខាទូទាំងប្រទេសកូរ៉េ ត្រូវបានក្រុមហ៊ុនសៃសាន់ទទួលបានសិទ្ធលើ Master Franchise នៅកម្ពុជា៕