(បរទេស)៖ នៅក្នុងជំហានអភិវឌ្ឍដ៏ធំមួយនៃបច្ចេកវិទ្យាថ្ម ក្រុមអ្នកវិទ្យាសាស្ត្រចិនបានអភិវឌ្ឍន៍ថ្មដែលផ្អែកលើវត្ថុក្រាហ្វេន (Graphene) ដែលអាចសាកភ្លើងពេញក្នុងរយៈពេលត្រឹមតែ ៥នាទីប៉ុណ្ណោះ ហើយមានសមត្ថភាពប្រើប្រាស់បានយូរជាងថ្មលីទីយ៉ូមបុរាណដល់ទៅ ៤ ដង។

ភាពរីកចម្រើននេះនឹងជួយបញ្ចប់បញ្ហាដ៏ធំមួយដែលអ្នកប្រើប្រាស់ឧបករណ៍អេឡិចត្រូនិចទំនើបជាច្រើនកំពុងប្រឈមនាពេលបច្ចុប្បន្ន គឺរយៈពេលនៃការសាកថ្មយូរពេក បន្ថែមទាំងធ្វើឲ្យការរក្សាទុកថាមពលកាន់តែមានសុវត្ថិភាពជាងមុនផងដែរ។ ថ្មក្រាហ្វេនមានរចនាសម្ព័ន្ធពិសេស ដោយសារវាជាស្រទាប់តែមួយនៃអាតូមកាបូនដែលរៀបចំជាសំណង់រង្វង់ឆ្មា (honeycomb lattice) អាចឲ្យអេឡិចត្រុងឆ្លងកាត់បានលឿនប្រហែល ១០០ ដងលឿនជាងនៅក្នុងខ្សែស្ពាន់។ ដោយសារតែសមត្ថភាពដឹកនាំអគ្គិសនីខ្ពស់នេះ ថ្មក្រាហ្វេនអាចសាកភ្លើងបានយ៉ាងលឿន រក្សាភាពត្រជាក់ និងមានស្ថេរភាពខ្ពស់។ ផ្ទុយពីថ្មលីទីយ៉ូមដែលអាចឆេះ ឬផ្ទុះ នៅពេលមានការរំខានបច្ចេកទេស ថ្មក្រាហ្វេនមិនមានហានិភ័យនោះទេ ដូច្នេះវាសមរម្យណាស់សម្រាប់ប្រើប្រាស់ក្នុងរថយន្តអគ្គិសនី ដ្រូន និងឧបករណ៍ចល័តផ្សេងៗ។

លទ្ធផលនៃការសាកល្បងបង្ហាញថា ថ្មនេះអាចរក្សាសមត្ថភាពប្រើប្រាស់បានយូរដល់ទៅ ៣,៥០០ ដងនៃការសាកឡើងវិញ ដោយមិនបាត់បង់សមត្ថភាពសំខាន់ៗខ្លាំងឡើយ។ នេះជាលទ្ធផលលើសពីថ្មលីទីយ៉ូម ដែលភាគច្រើនចាប់ផ្តើមចាញ់ថាមពលបន្ទាប់ពីប្រើប្រាស់ប្រហែល ៨០០ ដង។ ក្នុងអំឡុងពេលដែលរោងចក្រនៅចិនកំពុងពង្រីកការផលិតថ្មនេះ សកលលោកអាចនឹងឈានចូលទៅក្នុងសម័យថ្មីមួយ ដែលការសាកភ្លើងក្នុងរយៈពេលតែ ៥ នាទីអាចផ្គត់ផ្គង់ថាមពលឲ្យរថយន្ត ឬទូរស័ព្ទដៃប្រើប្រាស់បានជាយូរថ្ងៃ៕