(បរទេស)៖ ខែតុលា ឆ្នាំ២០២៥ បានបញ្ចប់ តម្លៃរបស់ Bitcoin មានការបាត់បង់យ៉ាងច្រើនជាលើកដំបូងក្នុងរយៈពេល៧ឆ្នាំមកនេះ ពោលចាប់តាំងពីឆ្នាំ២០១៨ មក។ តាមរយៈរបាយការណ៍ពី Reuters និង Investing.com បង្ហាញថា Bitcoin បានធ្លាក់ប្រហែល ៣% ទៅ ៥% ក្នុងខែតុលា។ មុនពេលនោះ តម្លៃបានឡើងដល់កម្រិតខ្ពស់បំផុតប្រមាណ ១២៦,០០០ដុល្លារក្នុងមួយកាក់ Bitcoin ប៉ុន្តែបានធ្លាក់ចុះយ៉ាងលឿនដល់ប្រមាណ ១០៤,៧៨២ដុុល្លារក្នុងពេលប៉ុន្មានម៉ោង នៅថ្ងៃទី ១០–១១ ខែតុលា ក្នុងហេតុការណ៍មួយដែលគេហៅថា «flash crash»។

ខែតុលាតែងតែជាខែដែល Bitcoin មានការកើនឡើងជាប្រវត្តិសាស្ត្រ ដូច្នេះការបាត់បង់លើកនេះបានបង្កឲ្យអ្នកវិនិយោគជាច្រើនព្រួយបារម្ភអំពីទិសដៅទីផ្សារ។ អ្នកវិភាគមួយចំនួនបានបញ្ជាក់ថា កត្តាដែលជំរុញឲ្យតម្លៃធ្លាក់រួមមាន៖

* ការលក់យកប្រាក់ចំណេញពីអ្នកវិនិយោគរយៈពេលវែង
* ការកើនឡើងនៃភាពមិនប្រាកដប្រជាក្នុងសេដ្ឋកិច្ចពិភពលោក
* ការកើនឡើងនៃសម្ពាធពីវិស័យហិរញ្ញវត្ថុ និងគោលនយោបាយប្រាក់កម្ចី

មូលហេតុនាំឲ្យតម្លៃធ្លាក់ គឺការលុបបំបាត់ទីផ្សារធំមួយនៅពាក់កណ្តាលខែ ត្រូវបានគេចោទថាជាហេតុនាំឲ្យមានការធ្លាក់ចុះភ្លាមៗ។ បរិយាកាសសេដ្ឋកិច្ចអន្តរជាតិ មានភាពតានតឹងកើនឡើង ដោយសារទំនាក់ទំនងពាណិជ្ជកម្មរវាងអាមេរិក និងចិន ក៏ដូចជាការមិនប្រាកដថា ធនាគារកណ្តាលអាមេរិក (Fed) នឹងបន្តកាត់អត្រាការប្រាក់ទៀតឬអត់។ ទិន្នន័យលើបណ្តាញ blockchain បង្ហាញថា ម្ចាស់កាន់កាប់កាក់ក្នុងរយៈពេល ៦–១២ ខែចុងក្រោយ បានចាប់ផ្តើមលក់ចេញវិញ។

គួរជម្រាបថា នៅពេលចុងខែតម្លៃ Bitcoin ត្រូវបានរក្សានៅប្រមាណ ១០៩,៧០០ដុល្លារ ប៉ុន្តែទោះបីជាខែតុលាមានការបាត់បង់ក៏ដោយ Bitcoin នៅតែមានការកើនឡើងសរុបប្រចាំឆ្នាំ២០២៥ បើប្រៀបធៀបទៅនឹងដើមឆ្នាំ។ អ្វីដែលគួរតែតាមដានបន្ត គឺការអនុវត្តន៍នៅខែវិច្ឆិកា និងខែធ្នូ ដើម្បីមើលថាតើ Bitcoin អាចស្ដារវិញឬនៅតែខ្សោយ៕