Meta ព្យាករណ៍ថា ១០% នៃការលក់ឆ្នាំ ២០២៤ មកពីការផ្សាយពាណិជ្ជកម្មបន្លំ និងខុសច្បាប់
10-11-2025 07:59
(បរទរស)៖ យោងតាមរបាយការណ៍មួយចេញផ្សាយដោយ Reuters កាលពីថ្ងៃព្រហស្បតិ៍ Meta បានព្យាករណ៍ថា ១០% នៃការលក់សរុបរបស់ខ្លួននៅឆ្នាំ ២០២៤ ឬប្រមាណ ១៦ ពាន់លានដុល្លារ គឺបានមកពីការដំណើរការការផ្សាយពាណិជ្ជកម្មអនឡាញសម្រាប់ការបន្លំ (Scam) និងទំនិញដែលត្រូវបានហាមឃាត់។
ការផ្សាយពាណិជ្ជកម្មប្រភេទនោះរួមមាន ការផ្សព្វផ្សាយអំពី «ពាណិជ្ជកម្មតាមអ៊ីនធឺណិត និងគ្រោងការវិនិយោគដែលមានលក្ខណៈបោកប្រាស់ ភ្នាល់អនឡាញខុសច្បាប់ និងការលក់ផលិតផលឱសថដែលត្រូវបានហាមឃាត់» នេះបើតាមរបាយការណ៍របស់ Reuters ដែលផ្អែកលើឯកសារផ្ទៃក្នុងរបស់ក្រុមហ៊ុន។ ឯកសារទាំងនោះបានបង្ហាញពីកិច្ចខិតខំប្រឹងប្រែងរបស់ក្រុមហ៊ុនក្នុងការវាយតម្លៃពីការរីករាលដាលនៃការផ្សាយពាណិជ្ជកម្មក្លែងក្លាយនៅលើកម្មវិធីរបស់ខ្លួនដូចជា Facebook និង Instagram។
Meta ទទួលបានការលក់សរុបជាង ១៦៤.៥ ពាន់លានដុល្លារ សម្រាប់ឆ្នាំ ២០២៤។ សប្ដាហ៍មុន ក្រុមហ៊ុនបានប្រកាសថា ប្រាក់ចំណូលត្រីមាសទីបីបានកើនឡើង ២៦% បើធៀបនឹងឆ្នាំមុន ដល់ ៥១.២៤ ពាន់លានដុល្លារ ហើយបានបង្កើនចំណាយសរុបសម្រាប់ឆ្នាំនេះចំនួន ២ ពាន់លានដុល្លារ ជាផ្នែកមួយនៃការវិនិយោគដ៏ធំរបស់ខ្លួនលើ បញ្ញាសិប្បនិមិត្ត (Artificial Intelligence)។
របាយការណ៍របស់ Reuters បានលើកឡើងពីឯកសារខែធ្នូ ឆ្នាំ ២០២៤ ដែលបង្ហាញថា Meta ទទួលបានប្រាក់ចំណូលប្រចាំឆ្នាំប្រហែល ៧ ពាន់លានដុល្លារ ពីការផ្សាយពាណិជ្ជកម្មបន្លំដែលត្រូវបានគេហៅថា «មានហានិភ័យខ្ពស់ជាង» ដែលជាការផ្សព្វផ្សាយដែលច្បាស់ថាមានលក្ខណៈបោកប្រាស់ (scam ads)។ របាយការណ៍ដដែលបានបញ្ជាក់ថា ក្នុងមួយថ្ងៃៗ Meta បង្ហាញការផ្សាយពាណិជ្ជកម្មបន្លំដែលមានហានិភ័យខ្ពស់ជាងនេះប្រហែល ១.៥ ម៉ឺនលាន ដល់អ្នកប្រើប្រាស់។
ថ្វីបើឯកសារមួយចំនួនបង្ហាញថា Meta មានគោលបំណងកាត់បន្ថយចំនួនការផ្សាយពាណិជ្ជកម្មក្លែងក្លាយលើវេទិការបស់ខ្លួនក៏ដោយ របាយការណ៍របស់ Reuters ក៏បានលើកឡើងថា ឯកសារផ្សេងទៀតបានបង្ហាញថា ក្រុមហ៊ុនមានការព្រួយបារម្ភថា ការព្យាករណ៍អាជីវកម្មរបស់ខ្លួនអាចនឹងត្រូវប៉ះពាល់ដោយការលុបចោលការផ្សព្វផ្សាយបោកប្រាស់ណាមួយភ្លាមៗ។
អ្នកនាំពាក្យរបស់ Meta បាននិយាយថា ក្រុមហ៊ុនបានដោះស្រាយការផ្សាយពាណិជ្ជកម្មបន្លំ និងក្លែងក្លាយលើកម្មវិធីរបស់ខ្លួន «យ៉ាងមុតមាំ»។ អ្នកនាំពាក្យបានថ្លែងក្នុងសេចក្ដីប្រកាសថា ការព្យាករណ៍ដែលថា ១០% នៃការលក់ពាណិជ្ជកម្មរបស់ក្រុមហ៊ុនក្នុងឆ្នាំ ២០២៤ គឺបានមកពីការផ្សាយពាណិជ្ជកម្មមិនពិត «គឺជាការប៉ាន់ប្រមាណដែលមិនមែនជាតួលេខចុងក្រោយឬចុងក្រោយបង្អស់នោះទេ តាមពិតការត្រួតពិនិត្យជាបន្តបន្ទាប់បានបង្ហាញថា ការផ្សាយពាណិជ្ជកម្មជាច្រើនក្នុងចំណោមនោះមិនបានបំពានច្បាប់អ្វីឡើយ»។
អ្នកនាំពាក្យបានបន្ថែមថា «ជាអកុសល ឯកសារដែលលេចធ្លាយទាំងនោះបានបង្ហាញទស្សនៈដែលបានជ្រើសរើសយ៉ាងចង្អៀត ដែលធ្វើឲ្យខូចទ្រង់ទ្រាយវិធីសាស្ត្ររបស់ Meta ក្នុងការដោះស្រាយការបោកប្រាស់ និងការក្លែងបន្លំ ដោយផ្ដោតតែលើកិច្ចខិតខំរបស់យើងក្នុងការវាយតម្លៃទំហំនៃបញ្ហានេះ មិនមែនវិសាលភាពទាំងមូលនៃវិធានការដែលយើងបានចាត់យកដើម្បីដោះស្រាយបញ្ហានេះឡើយ»៕
