Apple ប្រកាសត្រៀមចេញមុខងារផ្កាយរណបថ្មី អាចប្រើបានសូម្បីតែ iPhone នៅក្នុងហោប៉ៅ
10-11-2025 16:02
(បរទេស)៖ ក្រុមហ៊ុនបច្ចេកវិទ្យា Apple ត្រូវបានគេរាយការណ៍ថា កំពុងធ្វើការលើគម្រោងដ៏ធំមួយដើម្បីធ្វើឲ្យ iPhone ជំនាន់ក្រោយកាន់តែអស្ចារ្យដោយសារមុខងារផ្កាយរណប។ បច្ចុប្បន្ន iPhone អាចប្រើផ្កាយរណបបានត្រឹមតែសម្រាប់ ការហៅសង្គ្រោះបន្ទាន់ (Emergency SOS) ប៉ុណ្ណោះ តែទៅថ្ងៃអនាគត Apple ចង់ឲ្យមុខងារនេះអាចប្រើបានច្រើនទៀត ហើយអ្វីដែលពិសេស គឺអ្នកអាចភ្ជាប់ទៅផ្កាយរណបបានសូម្បីតែពេលទូរស័ព្ទនៅក្នុងហោប៉ៅ ឬក្នុងឡាន ដោយមិនចាំបាច់លើកតម្រង់ទៅលើមេឃដូចសព្វថ្ងៃឡើយ។ នេះបើយោងតាមការចេញផ្សាយដោយ Apple Insider នៅថ្ងៃទី១០ ខែវិច្ឆិកា ឆ្នាំ២០២៥។
យោងតាមការចុះផ្សាយរបស់អ្នកជំនាញមកពីសារព័ត៌មាន Bloomberg គឺលោក Mark Gurman បានបញ្ជាក់ថា ក្រុមហ៊ុន Apple កំពុងរៀបចំបញ្ចូលបច្ចេកវិទ្យាសំខាន់ៗជាច្រើនទៀតដែលទាក់ទងនឹងការតភ្ជាប់ផ្កាយរណប។ មុខងារថ្មីទាំងនោះរួមមាន៖
* អាចអនុញ្ញាតឲ្យអ្នកផ្ញើ រូបថត តាមរយៈសារផ្កាយរណប (ជំនួសការផ្ញើបានតែអក្សរ) ដូចសព្វថ្ងៃ។
* អាចធ្វើឲ្យ Apple Maps ដំណើរការបង្ហាញផែនទីបានយ៉ាងពេញលេញតាមរយៈការតភ្ជាប់ផ្កាយរណប។
* អនុញ្ញាតឲ្យ កម្មវិធីផ្សេងៗ (Third-Party Apps) អាចប្រើប្រាស់ការតភ្ជាប់ផ្កាយរណបនេះបានផងដែរ។
ការកែលម្អសមត្ថភាពតភ្ជាប់ផ្កាយរណបនេះនឹងផ្ដល់អត្ថប្រយោជន៍ខ្ពស់ដល់អ្នកដែលធ្វើដំណើរទៅកាន់ទីតាំងដាច់ស្រយាល ព្រោះពួកគេអាចទទួលបានព័ត៌មានសំខាន់ៗ ដូចជាព័ត៌មានអាកាសធាតុបានទាន់ពេលវេលា។ ដើម្បីសម្រេចផែនការមហិច្ឆតានេះ ក្រុមហ៊ុន Apple បានវិនិយោគទឹកប្រាក់ដល់ទៅ ១.១ ពាន់លានដុល្លារ ក្នុងក្រុមហ៊ុន Globalstar ដែលជាដៃគូផ្កាយរណបបច្ចុប្បន្ន។ លើសពីនេះ គេរំពឹងថា iPhone ជំនាន់ឆ្នាំ ២០២៦ នឹងមានការគាំទ្របច្ចេកវិទ្យា 5G NTN (Non-Terrestrial Networks) កាន់តែទូលំទូលាយ ដែលអនុញ្ញាតឲ្យប៉មទូរស័ព្ទអាចប្រើប្រាស់ផ្កាយរណបសម្រាប់បង្កើនការគ្របដណ្ដប់សេវាថែមទៀតផង។
សរុបមក Apple ចង់បង្វែរបច្ចេកវិទ្យាតភ្ជាប់ផ្កាយរណបនេះពីគ្រាន់តែជាឧបករណ៍សម្រាប់គ្រោះថ្នាក់បន្ទាន់ឲ្យក្លាយជាផ្នែកមួយដែលមិនអាចខ្វះបាននៃការប្រើប្រាស់ទូរស័ព្ទជាប្រចាំថ្ងៃរបស់មនុស្សគ្រប់រូបនៅទូទាំងពិភពលោក៕
