(បរទេស)៖ តុលាការអាល្លឺម៉ង់ នៅទីក្រុងមុយនិច បានចេញសាលក្រមដ៏សំខាន់មួយ ដោយសម្រេចថា កម្មវិធីជជែកឆ្លើយឆ្លង (chatbot) ChatGPT របស់ក្រុមហ៊ុនយក្ស OpenAI បានបំពានច្បាប់រក្សាសិទ្ធិ យ៉ាងច្បាស់លាស់។ ការសម្រេចនេះធ្វើឡើង បន្ទាប់ពីតុលាការរកឃើញថា ប្រព័ន្ធបញ្ញាសិប្បនិម្មិត (AI) របស់ក្រុមហ៊ុននេះ បានយកទំនុកច្រៀងបទចម្រៀងអាល្លឺម៉ង់ល្បីៗចំនួន ៩ បទ រួមទាំងបទល្បីៗរបស់តារាចម្រៀង Herbert Groenemeyer ទៅប្រើប្រាស់សម្រាប់ការបង្វឹក AI ដោយមិនបានសុំការអនុញ្ញាត ឬបង់ប្រាក់នោះទេ។ បណ្តឹងនេះត្រូវបានដាក់ដោយសមាគមសិទ្ធិតន្ត្រីអាល្លឺម៉ង់ (GEMA)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១២ ខែវិច្ឆិកា ឆ្នាំ២០២៥។

តុលាការបានបញ្ជាឱ្យ OpenAI បង់ប្រាក់សំណងការខូចខាត ចំពោះការប្រើប្រាស់សម្ភារៈដែលមានការរក្សាសិទ្ធិនេះ។ នាយកប្រតិបត្តិ (CEO) របស់ GEMA លោក Tobias Holzmueller បានសម្តែងការពេញចិត្ត និងបានសង្កត់ធ្ងន់ទៅលើសារៈសំខាន់នៃសាលក្រមនេះថា៖ «អ៊ីនធឺណិតមិនមែនជាហាងលក់ទំនិញខ្លួនឯងទេ ហើយស្នាដៃច្នៃប្រឌិតរបស់មនុស្សក៏មិនមែនជាគំរូឥតគិតថ្លៃដែរ។ ថ្ងៃនេះ យើងបានបង្កើតគំរូដើមដែលការពារ និងបញ្ជាក់សិទ្ធិរបស់អ្នកនិពន្ធ៖ សូម្បីតែប្រតិបត្តិករនៃឧបករណ៍ AI ដូចជា ChatGPT ក៏ត្រូវតែអនុវត្តតាមច្បាប់រក្សាសិទ្ធិដែរ»។ សាលក្រមនេះ ត្រូវបានគេមើលឃើញថា អាចនឹងក្លាយជាគំរូដើមដំបូងគេនៅអឺរ៉ុប សម្រាប់កំណត់បទប្បញ្ញត្តិលើការប្រើប្រាស់ស្នាដៃសិល្បៈដោយក្រុមហ៊ុន AI។

ទោះបីជា OpenAI ប្រកែកថា ខ្លួនមិនបានចម្លងទិន្នន័យជាក់លាក់ទេ ហើយថាការទទួលខុសត្រូវគួរតែស្ថិតលើអ្នកប្រើប្រាស់ដែលបញ្ចូលសំណួរ (prompts) ក៏ដោយ តុលាការនៅតែរកឃើញថា ទាំងការចងចាំទំនុកច្រៀងនៅក្នុងប្រព័ន្ធ AI និងការបង្ហាញទំនុកច្រៀងនោះមកវិញ សុទ្ធតែជាការបំពានសិទ្ធិ។ យ៉ាងណាមិញ ក្រុមហ៊ុន OpenAI ក៏បានប្រកាសថា ខ្លួនមិនយល់ស្របនឹងសាលក្រមនេះទេ ហើយកំពុងពិចារណាលើការប្តឹងឧទ្ធរណ៍។ អ្នកនាំពាក្យក្រុមហ៊ុនបានបញ្ជាក់ថា សេចក្តីសម្រេចនេះ «គឺសម្រាប់តែទំនុកច្រៀងមួយចំនួនកំណត់ប៉ុណ្ណោះ ហើយមិនប៉ះពាល់ដល់មនុស្សរាប់លាននាក់» ដែលប្រើប្រាស់បច្ចេកវិទ្យារបស់ពួកគេជារៀងរាល់ថ្ងៃនោះទេ។ ករណីនេះបានឆ្លុះបញ្ចាំងពីក្តីបារម្ភជាសកលអំពីសិទ្ធិ AI និងតន្ត្រី ដែលស្រដៀងនឹងបណ្តឹងដែលក្រុមហ៊ុនតន្ត្រី Bollywood កំពុងដាក់នៅប្រទេសឥណ្ឌាដែរ៕