Nvidia បដិសេធភ្លាមៗនូវការវិនិយោគ ១ ពាន់លានដុល្លារក្នុងមជ្ឈមណ្ឌល AI នៅម៉ិកស៊ិក ក្រោយអភិបាលរដ្ឋប្រកាសយ៉ាងគគ្រឹកគគ្រេង
13-11-2025 11:28
(បរទេស)៖ ក្រុមហ៊ុនផលិតបន្ទះឈីបដ៏មានឥទ្ធិពលបំផុតលើពិភពលោក Nvidia បានធ្វើឱ្យសាធារណជនភ្ញាក់ផ្អើលយ៉ាងខ្លាំងកាលពីពេលថ្មីៗនេះ ដោយបានចេញមុខបដិសេធទាំងស្រុងនូវការវិនិយោគដ៏ធំមួយដែលមានតម្លៃរហូតដល់ ១ ពាន់លានដុល្លារ នៅក្នុងរដ្ឋ Nuevo Leon ភាគខាងជើងប្រទេសម៉ិកស៊ិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៣ ខែវិច្ឆិកា ឆ្នាំ២០២៥។
ការបដិសេធនេះបានកើតឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីអភិបាលរដ្ឋ លោក Samuel Garcia បានបង្ហោះវីដេអូប្រកាសយ៉ាងគគ្រឹកគគ្រេងថា Nvidia នឹងមកសាងសង់មជ្ឈមណ្ឌលទិន្នន័យ (Data Center) បញ្ញាសិប្បនិមិត្ត (AI) ប្រភេទបៃតងដ៏ធំមួយក្នុងរដ្ឋរបស់លោក។ អ្វីដែលកាន់តែគួរឱ្យឆ្ងល់នោះ គឺក្នុងវីដេអូនោះ ក៏មានវត្តមានតំណាងក្រុមហ៊ុន Nvidia អង្គុយក្បែរលោកអភិបាលផងដែរ តែពួកគេមិនបានចេញមុខបញ្ជាក់ ឬបដិសេធអ្វីឡើយ។
ជាការឆ្លើយតបទៅនឹងសេចក្តីប្រកាសនេះ ក្រុមហ៊ុន Nvidia បានចេញសេចក្តីថ្លែងការណ៍ទៅកាន់ទីភ្នាក់ងារសារព័ត៌មាន Reuters ថា៖ «Nvidia មិនមានផែនការវិនិយោគហិរញ្ញវត្ថុនៅក្នុងរដ្ឋ Nuevo Leon ទេ»។ ក្រុមហ៊ុនបានពន្យល់បន្ថែមថា ការគាំទ្រផ្នែកបច្ចេកវិទ្យារបស់ខ្លួននៅអាមេរិកឡាទីន គឺផ្តោតតែលើ «កិច្ចសហប្រតិបត្តិការ ការស្រាវជ្រាវ និងការអភិវឌ្ឍទេពកោសល្យតែប៉ុណ្ណោះ» ដោយមិនមានការបោះទុនផ្ទាល់នោះទេ។
ក្រោយពីមានការបដិសេធរបស់ Nvidia លោក អភិបាលរដ្ឋ Garcia ក៏បានកែតម្រូវព័ត៌មានរបស់លោកវិញភ្លាមៗ ដោយបញ្ជាក់ថា ការវិនិយោគមជ្ឈមណ្ឌលទិន្នន័យបៃតងដែលមានតម្លៃ ១ ពាន់លានដុល្លារនោះ គឺជារបស់ក្រុមហ៊ុន CIPRE Holding របស់ម៉ិកស៊ិកទៅវិញទេ ហើយក្រុមហ៊ុនក្នុងស្រុកនេះនឹងប្រើប្រាស់តែបច្ចេកវិទ្យារបស់ Nvidia ក្នុងគម្រោងរបស់ខ្លួន៕
