(បរទេស)៖ ក្រុមហ៊ុនបច្ចេកវិទ្យាយក្សរបស់អាមេរិក Amazon បានប្រកាសពីការរៃអង្គាសប្រាក់ឲ្យបាន ១៥ពាន់លានដុល្លារ ពីការលក់មូលបត្របំណុល ដែលនេះជាការលក់លើកដំបូងរបស់ខ្លួនក្នុងរយៈពេលបីឆ្នាំចុងក្រោយ។ ការចេញលក់នេះ មានគោលបំណងបង្កើនធនធានសម្រាប់ការវិនិយោគដ៏ធំទូលាយក្នុងបច្ចេកវិទ្យាបញ្ញាសិប្បនិម្មិត (AI) និងបណ្តាញទិន្នន័យ (data centers) ដែលក្រុមហ៊ុនកំពុងពង្រីកយ៉ាងសកម្ម។

ការចេញលក់នេះ ត្រូវបានរាយការណ៍ថាទាក់ទាញការបញ្ជាទិញពីអ្នកវិនិយោគជាង ៨០ពាន់លានដុល្លារ បង្ហាញពីកម្រិតជឿទុកចិត្តខ្ពស់លើសមត្ថភាពហិរញ្ញវត្ថុនិងវិស័យអាជីវកម្មរបស់អាម៉ាហ្សុន។ បំណុលត្រូវបានបែងចែកជាចំណាត់ថ្នាក់៦ (tranches) មានរយៈពេលបង់ប្រាក់រយៈពេលវែងបំផុតដល់ ៤០ឆ្នាំ ខណៈដែលការកំណត់អត្រាការប្រាក់ត្រូវបានពិភាក្សាថា ទាបជាងការរំពឹងទុក ដោយសារការស្នើសុំខ្ពស់ពីអ្នកវិនិយោគ។ អ្នកជំនាញបានឲ្យដឹងថាចំណូលពីការលក់មូលបត្របំណុលនេះ នឹងត្រូវប្រើសម្រាប់ ការទិញអាជីវកម្ម (acquisitions),ការចំណាយទុនលើហេដ្ឋារចនាសម្ព័ន្ធ (CapEx), ការទិញយកភាគហ៊ុនវិញ (share buybacks) និងជាពិសេស ការចំណាយលើការអភិវឌ្ឍសមត្ថភាព AI និង AWS ដើម្បីប្រកួតប្រជែងក្នុង «AI arms race» ជាមួយក្រុមហ៊ុនបច្ចេកវិទ្យាធំៗផ្សេងទៀត។

គួរជម្រាបថា អាម៉ាហ្សុនកំពុងវិនិយោគថវិកាក្នុងចំនួនដ៏ធំក្នុងការផ្សព្វផ្សាយបច្ចេកវិទ្យា AI ដោយសារតម្រូវការកំពុងកើនឡើងក្នុងវិស័យ Cloud និងកម្មវិធី AI ដែលត្រូវការកម្លាំងគណនា និងមជ្ឈមណ្ឌលទិន្នន័យច្រើនជាងពេលមុន។ អ្នកវិភាគទីផ្សារមួយចំនួនព្រួយបារម្ភអំពីការកើនឡើងនៃបំណុលរបស់ក្រុមហ៊ុនបច្ចេកវិទ្យាធំៗក្នុងការពង្រីក AI ប៉ុន្តែវិនិយោករមានទស្សនៈថា ការវិនិយោគរយៈពេលវែងនេះ នឹងផ្តល់ផលប្រយោជន៍ដល់អាម៉ាហ្សុននៅពេលអនាគត ដោយសារតម្រូវការទិន្នន័យ និង AI មិនសូវធ្លាក់ចុះ៕