(បរទេស)៖ ក្រុមហ៊ុន Honda Motor បានប្រកាសពីដំណឹងដ៏ល្អមួយថា ខ្លួននឹងចាប់ផ្តើមដំណើរការផលិតរថយន្តឡើងវិញជាធម្មតាបន្តិចម្តងៗ នៅតាមរោងចក្រដំឡើងយានយន្តរបស់ខ្លួននៅអាមេរិកខាងជើង ចាប់ពីថ្ងៃច័ន្ទសប្តាហ៍ក្រោយនេះតទៅ។ នេះគឺជាសញ្ញាវិជ្ជមានច្បាស់លាស់មួយ ដែលបង្ហាញថា បញ្ហាខ្វះខាតបន្ទះឈីបម៉ាក «Nexperia» ដែលបានបង្កឱ្យមានការរំខានយ៉ាងខ្លាំងដល់ខ្សែសង្វាក់ផលិតកម្មរថយន្តនោះ ត្រូវបានដោះស្រាយ និងគ្រប់គ្រងបានជាបណ្តើរៗហើយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៨ ខែវិច្ឆិកា ឆ្នាំ២០២៥។

ក្រុមហ៊ុន Honda ដែលជាក្រុមហ៊ុនផលិតរថយន្តធំទីពីររបស់ជប៉ុន បានបង្ខំចិត្តផ្អាកការផលិតនៅរោងចក្រម៉ិកស៊ិកកាលពីថ្ងៃទី ២៨ ខែតុលា និងបានកែសម្រួលបន្ថយល្បឿននៃការផលិតនៅរោងចក្រនានាក្នុងសហរដ្ឋអាមេរិក និងកាណាដា ចាប់តាំងពីថ្ងៃទី ២៧ ខែតុលា ដោយសារតែកង្វះខាតបន្ទះឈីបសំខាន់ៗទាំងនេះ។

យ៉ាងណាមិញ នៅថ្ងៃអង្គារនេះ អ្នកនាំពាក្យរបស់ក្រុមហ៊ុន Honda បានបញ្ជាក់ថា ក្រុមហ៊ុនបានរក្សាទុក និងទទួលបានការផ្គត់ផ្គង់បន្ទះឈីបក្នុងកម្រិតមួយដែលអាចអនុញ្ញាតឱ្យដំណើរការឡើងវិញបាន តាមរយៈការស្វែងរកសមាសធាតុផ្គត់ផ្គង់ជំនួស។ ចំពោះសំណួរថាតើក្រុមហ៊ុន Nexperia បានបន្តការដឹកជញ្ជូនធម្មតាវិញឬអត់នោះ អ្នកនាំពាក្យបានស្នើឱ្យអ្នកសាកសួរ ទៅកាន់ក្រុមហ៊ុន Nexperia ដោយផ្ទាល់។

ទោះបីជាមានការគ្រោងទុកឱ្យត្រឡប់ទៅរកប្រតិបត្តិការធម្មតានៅសប្តាហ៍ក្រោយក្តី អ្នកនាំពាក្យបានបន្ថែមការប្រុងប្រយ័ត្នថា ផែនការនេះអាចនឹងមានការប្រែប្រួល ដ្បិតស្ថានភាពនៃការផ្គត់ផ្គង់នៅលើទីផ្សារ នៅតែមិនទាន់មានលំនឹង ទាំងស្រុងនៅឡើយ៕