(បរទេស)៖ លោក Yann LeCun ដែលត្រូវបានគេទទួលស្គាល់ថាជា «បិតាម្នាក់នៃបញ្ញាសិប្បនិម្មិត (AI) សម័យទំនើប» និងជាអ្នកវិទ្យាសាស្ត្រជាន់ខ្ពស់បំផុតនៅក្រុមហ៊ុន Meta (Facebook) បានប្រកាសលាឈប់ពីតំណែងដ៏មានឥទ្ធិពលរបស់លោកហើយ។ ការចាកចេញនេះគឺដើម្បីបង្កើតក្រុមហ៊ុន Startup ផ្ទាល់ខ្លួន ដែលមានគោលដៅបង្កើត AI ជំនាន់ថ្មីដែលមានសមត្ថភាពដ៏អស្ចារ្យ។ នេះបើយោងតាមការចេញផ្សាយដោយ​ CNBC នៅថ្ងៃទី១៩ ខែវិច្ឆិកា ឆ្នាំ២០២៥។

ក្រុមហ៊ុនថ្មីរបស់លោក LeCun នឹងផ្តោតលើការស្រាវជ្រាវដែលមានឈ្មោះថា Advanced Machine Intelligence (AMI) ឬ «ម៉ូដែលពិភពលោក» (World Models) ដែលជាគម្រោងដ៏ធំមួយដើម្បីកសាង AI ដែលអាច យល់ដឹងពីពិភពលោកពិតប្រាកដ មានការចងចាំ និងអាចគិតបានស្មុគស្មាញដូចមនុស្ស។ លោក LeCun បានសរសេរយ៉ាងច្បាស់អំពីចក្ខុវិស័យរបស់លោកថា៖ «គោលដៅនៃ Startup គឺដើម្បីនាំមកនូវបដិវត្តន៍ដ៏ធំមួយបន្ទាប់នៅក្នុង AI ៖ ប្រព័ន្ធដែលយល់ពីពិភពលោកពិត, មានការចងចាំជាប់លាប់, អាចវែកញែក, និងអាចរៀបចំផែនការលំដាប់នៃសកម្មភាពដ៏ស្មុគស្មាញ»។ នេះជាការផ្តាច់ខ្លួនដើម្បីបន្តគោលដៅធំបំផុតរបស់លោក ខណៈដែល Meta ផ្ទាល់បានសម្រេចចិត្តចូលរួមជាដៃគូជាមួយក្រុមហ៊ុនថ្មីនេះ។

ការចាកចេញនេះកើតឡើងចំពេលមានភាពតានតឹងផ្ទៃក្នុងនៅក្នុងផ្នែក AI របស់ Meta ដែលត្រូវបានរៀបចំឡើងវិញ និងជ្រើសរើសអ្នកដឹកនាំថ្មី រួមទាំងលោក Alexandr Wang វ័យ ២៨ ឆ្នាំ បន្ទាប់ពីម៉ូដែល AI មួយចំនួនមិនទទួលបានការគាំទ្រគ្រប់គ្រាន់។ ភាពខុសគ្នាសំខាន់គឺ ទស្សនៈរបស់លោក LeCun តែងតែគាំទ្រការចែករំលែកការស្រាវជ្រាវ AI បើកចំហរ (Open-Source) ចំណែកឯអ្នកដឹកនាំថ្មីមានទំនោរទៅរកវិធីសាស្ត្របិទជិតជាងមុន ដើម្បីប្រកួតប្រជែងជាមួយគូប្រជែងដូចជា OpenAI និង Google។

លោក LeCun ជឿជាក់ថា ទោះបីជាកម្មវិធី AI ធំៗដូចជា ChatGPT មានឥទ្ធិពលក៏ដោយ ក៏ពួកគេមាន «ការយល់ដឹងមានកម្រិតអំពីពិភពលោក»។ ហេតុដូច្នេះហើយ ទើបលោកត្រូវការបច្ចេកវិទ្យាថ្មី ដើម្បីសម្រេចបាននូវ បញ្ញាសិប្បនិម្មិតទូទៅ (AGI) ដែលមានសមត្ថភាពស្មើ ឬលើសមនុស្ស។ លោកបានសង្កត់ធ្ងន់ថា ការបន្តគោលដៅនេះក្នុងនាមជាក្រុមហ៊ុនឯករាជ្យ គឺដើម្បី «ពង្រីកឥទ្ធិពលដ៏ទូលំទូលាយរបស់វាឲ្យបានជាអតិបរមា» ព្រោះកម្មវិធីរបស់វាខ្លះមិនទាក់ទងដោយផ្ទាល់នឹងផលប្រយោជន៍ពាណិជ្ជកម្មរបស់ Meta ឡើយ៕