(បរទេស)៖ ក្រុមហ៊ុនយក្សផ្នែកពាណិជ្ជកម្មអេឡិចត្រូនិកចិន Alibaba បានរាយការណ៍ពីលទ្ធផលប្រាក់ចំណូលប្រចាំត្រីមាសទីពីររបស់ខ្លួន ឆ្នាំសារពើពន្ធ ២០២៥ ដោយបង្ហាញពីចំណូលសរុបដែលបានវ៉ាដាច់ការព្យាករណ៍របស់អ្នកវិភាគ។ កំណើនដ៏រឹងមាំនេះត្រូវបានជំរុញជាចម្បងដោយការវិនិយោគយ៉ាងខ្លាំងក្លារបស់ក្រុមហ៊ុនទៅលើ សេវាលក់រាយរហ័ស (Quick Commerce) និងតម្រូវការកើនឡើងសម្រាប់បច្ចេកវិទ្យាបញ្ញាសិប្បនិម្មិត (AI) តាមរយៈសេវាកម្ម Cloud។

Alibaba បានរាយការណ៍ពីចំណូលសរុបចំនួន ២៤៧.៨ ប៊ីលានយ៉ន់ (ប្រហែល ៣៤.៨១ ប៊ីលានដុល្លារអាមេរិក) ដែលខ្ពស់ជាងការប៉ាន់ស្មានជាមធ្យម។ ទោះបីជាកំណើនប្រាក់ចំណេញសុទ្ធបានថយចុះដោយសារតែក្រុមហ៊ុនកំពុងស្ថិតក្នុង ដំណាក់កាលវិនិយោគ ក៏ដោយ ក៏លទ្ធផលនេះបានបង្ហាញយ៉ាងច្បាស់ពីសក្តានុពលកំណើនដ៏សំខាន់របស់ខ្លួននៅក្នុងវិស័យអាទិភាពចំនួនពីរ។

ទីមួយ Alibaba បានបន្តពង្រីកឥទ្ធិពលរបស់ខ្លួននៅក្នុងវិស័យលក់រាយរហ័ស (Instant Retail) ដោយចាក់បញ្ចូលទុនយ៉ាងច្រើនទៅលើសេវាដឹកជញ្ជូនឆាប់រង័ស ដើម្បីប្រកួតប្រជែងដណ្តើមចំណែកទីផ្សារ និងបង្កើនអ្នកប្រើប្រាស់កម្មវិធីទិញទំនិញរបស់ខ្លួន។ យុទ្ធសាស្ត្រនេះបានចូលរួមចំណែកយ៉ាងធំធេងក្នុងការបង្កើនកំណើននៅក្នុងផ្នែកពាណិជ្ជកម្មក្នុងស្រុក។

ទីពីរ Cloud Intelligence Group របស់ក្រុមហ៊ុនបានក្លាយជាប្រភពដ៏សំខាន់ជាមួយនឹងកំណើនចំណូលដ៏ខ្លាំងក្លា ដែលជំរុញដោយការកើនឡើងតម្រូវការសម្រាប់ថាមពលកុំព្យូទ័រ AI និងផលិតផលពាក់ព័ន្ធ (រួមទាំងគំរូភាសាដ៏ធំ Qwen របស់ពួកគេ)។ Alibaba បានបញ្ជាក់ថា ខ្លួនកំពុងស្ថិតក្នុងដំណាក់កាលវិនិយោគដើម្បីកសាងតម្លៃយុទ្ធសាស្ត្ររយៈពេលវែងនៅក្នុងបច្ចេកវិទ្យា និងហេដ្ឋារចនាសម្ព័ន្ធ AI ដោយមានបំណងក្លាយជាអ្នកផ្តល់សេវា AI ពេញលេញ។

សរុបមក ការសម្រេចបានចំណូលលើសការព្យាករណ៍ និងកំណើនយ៉ាងគំហុកនៅក្នុងវិស័យ AI និងការលក់រាយរហ័ស បានផ្តល់នូវសញ្ញាវិជ្ជមានដល់ទីផ្សារអំពីការងើបឡើងវិញផ្នែកប្រតិបត្តិការរបស់អាលីបាបា ទោះបីជាមានការចុះទុនដ៏ធំនៅក្នុងរយៈពេលខ្លីដើម្បីត្រួសត្រាយផ្លូវសម្រាប់កំណើននាពេលអនាគតក៏ដោយ៕